Rojda Seyidxan

 

QAMIŞLO - Cinîyê şaristanê Dêrikî vera hêrişê dewleta tirkî û komê girêdayê ci serê herra Vakur û Rojhelatê Sûrîyeye nêrazîbîyayîşî xo ramojnayî û vat: "Ma wayîrê hêzê û îrade yê, do tu dewletê dinya nêeşkê îradeyê ma bişiknê."

 

9ê teşrîna peyêne 2019 ra û heta nika dewleta tirkî  û komê girêdayê ci hêrişê xo serê herra Vakur û Rojhelatê Sûrîye dewam kenê. Tewr peyîn hêrişê înan yê serê Til Rifet, Şehba, Til Temir û dewê ci zêdeyîr bîyo. Derheqê babete de cinîyê şaristanî Dêrikî yê kantonê Qamişloyî hêrişê dewleta tirkî şermezar kerdî û vatî: "Kesê ke nê kerdişan kenê, ne edalet û ne zî heqê merdiman nas kenê. Ma do hemverê hêrişan vera xo bidê."

 

'Ma nêverdenê tu kes derbazê serê herra ma bibo'

 

Cinîya bi nameyê Şêrîn Omere hêrişê dewleta tirkî û komê girêdayê ci şermezar kerd û wina vat: ”Heta na saete dewleta tirkî hêrişê herêma ma kena û seba hêrişan bi hezaran kesî koçber bî. Labelê pêro dewletê dinya mîyanê bêvengî de yê. Ewro Til Temirî û Girê Spî  dewleta tirkî û çeteyê ci xeylêk zîyanê madî kerdî. Kesê ke nê kerdişan kenê, ne edalet û ne zî heqê merdiman nas kenê. Ma sey cinî heta peynî xo ver bidê û ma do nêverdê tu kes derbazê herra ma bibo."

 

'Do tu dewletê dinya nêeşkê îradeyê ma bişiknê'

 

Eynî wextî de cinîya bi nameyê Sakîne Nûrîye zî nêrazîbîyayîşê xo ardî ziwan û vat: "Ma hêrişê dewleta tirkî yê serê herra Vakur û Rojhelatê Sûrîye şermezar kenê. Ma do qetî îşxalkerdiş serê herra xo de qebul nêkerê. Amancê dewleta tirkî îşxalkerdene pêro herême yo, la do no bi ca nêro. Ma wayîrê hêz û îrade yê. Do tu dewletê dinya nêeşkê îradeyê ma bişiknê."