MERKEZÊ XEBERAN - 'Gelo fezaye de ma tena yî?' Zanyarê ke cewabê no persî gêrenî do bi rayîrê desan teleskopanê girdan fezaye de bigêrî cuye.

 

Astronomê eyaletê New Mexîco yê Dewletê Yewbîyaye yê Amerîka  (DYE) amadekarî kenî ke bi teleskopanê girdan bixebitî. Astronomî bi rayîrê 28 teleskopanê girdan yê radyo do hewl bidî ke fezaye de 'sînyalêko şenik’ ya zî 'teknolojîk' tespît bikerî.

 

Goreyê xebera ke The Guardîanî de ameye weşênayene, bi rayîrê no projeyî do Enstîtuya Setî Very Large Array (VLA) ke dezgeyê tewr gird yê dinya yo, hewl bido ke têgêrayîşê fezaye tespît bikera. Xebera ke rojname de ameye weşênayene dayeyê ke do VLA arê bido, do seba tespîtkerdişê cuya fezaye muhîm bibî.

 

Rayîrberê VLAye ra dîrektrorê Dezgeyê Ewnîyayîşê Astronomî yê Radyo yê Neteweyî Tony Beasleyî BBC rê qisey kerd û persê ‘Gelo fezaye de ma tena yî, ya nê?’ ke persanê tewr muhîman yê zanyaran ra yew o ard vîr. Tony îdîa kerd ke seba herînayîşê cewabê no persî, teleskopê girdî do rolêko muhîm kay bikerî.