MERKEZÊ XEBERAN - Goreyê raporê Neteweyê Yewbîyayeyî derheqê îhlalkerdişê heqê merdiman ê Îranî, tedayê serê rojnameger û çalakîkerê komelê sivîl û cinîyan dewam kenê.

 

Sekreterê Pêroyî yê Neteweyê Yewbîyayeyî (NY) Antonio Guterresî vîzêr derheqê rewşa heqê merdiman ê  Îranî de raporêk eşkera kerd. Rapor de ame vatene ke Îran de cezaya daliqnayene seba domanan dewam keno û cezaya dem dergî pawitoxanê heqê mardiman rê yena birnayene. Heto bîn ra yeno vatene, tedayê serê rojnameger û çalakîkerê komelê sivîlan ser o zî dewam keno.

 

Dewamê raporî de wina ame vatene: “Komîsyono Berz yê Heqê Merdiman ê Neteweyê Yewbîyayeyî, îşkence, tepiştiş, tedayê serê cinîyan û komelê  sivîlî yê Îranî piştrast kerdo. Tay rojnamegerê ke ameyê tepiştene zî zindanan de nînê dermankerdene."