MÊRDÎN - Gumanbar Mehmet Salîh Bulgano ke 2018ine de di ci ra cinî, hîrê kesî qetil kerd, sucê, 'plankerde kes kiştene’ hîrê rey rastê cezaya muebeto giran ame. Çawîşo bi nameyê F.D ke seba gumanbarî çek peyda kerdib zî dimayê qirkerdene bi lezabez teqawid bi.

 

Şemrexê Mêrdînî de bi nameyê Mehmet Salîh Bulgano ke 2017 de cinîya bi nameyê Rojda Andiça 17 serrî, bi zor wendegeh ra remna û aye dir zewicya. 2018 de menga Kanûne de Rojda vera şîdeto ke dîne, şî verê keyeyê xo. Nê ser o Mehmet Salîh Bulgan, şi keyeyê Rojdaye û keye de di cinî, pêroyî de 3 kesî qetil kerd.

 

Vejîya meydan ke seba şîdetê serê Rojdaye 6 mengî qerarê dûrvistişê Mehmet Salîh Bulganî bîyo û seba sucêko ameyo tepiştene û dima ra ameyo tehlîyekerdene zî nê qirkerdişî kerdo. Îdianameyo ke hetê Yewin Dadgeha Cezaya Giran ya Mêrdînî ra ame qebûlkerdene de, ame dîyarkerdene ke gumanbar Mehmet Salîh Bulganî tifing keso bi nameyê F.D ke o wext Şemrexî de çawîş bîyo girewto.

 

Roniştişê qerarî 10ê sibate de Yewin Dadgeha Cezaya Giran ya Mêrdînî de ame vînayene û seba Mehmet Salîh Bulganî zî sucê, ‘plankerde kiştene’ hîrê rey cezaya muebeto giran ame dayene. Hetê avûkatan ra ame dîyarkerdene ke F.D yo ke çek gumanbarî rê peyda kerdo zî bi lezabez  teqawid bîyo.