Berîtan Canozer

 

ÊLIH - Nurşen Ere û keyeyê aye ke dewa Zaxora ya Heskîfî de cuyayîne, keyeyê înan binê awa awbendî de mend. Nurşene da zanayene ke heta nika nêzdîyê 50 dewî binê awe de mendê û vat: "Êdî cayêko bi nameyê Heskîfî çin o. Wexto ke keyeyê xo wina vînena, xemgîn bena. Nêeşkena qebul bikerî."

 

Awbendê Ilisu yê ke Heskîfo wayîrê tarîxê 12 hezar serrî bi 199 cayan binê awe de verdo, roj bi roje berz beno. Xeylêk şikeftê herême, Pirda Heskifî û awanîyê tarîxî kewtî binê awe. Heto bîn ra zî beşêko pîl ê çemê Dîcle û Botanî zî binê awe de mend û nêzdîyê 50 dewî binê awe de vindî bî. Yew nê dewan ra zî dewa Zaxora ya. Nurşen Ere ke keyeyê xo dir cuyena, keyeyê înan ê dewe binê awe de mend, eşyayê xo nêeşkayî xelas bikerê.

 

'Seba keye û ersa 70 hezarî dayî'

 

Nurşena ke lebate kerd eşyayê ke keye de yê bixelisno û nê serdî de hewl dana domananê xo dir eleqedar bibo. Nurşene dîyar kerd ke nê çîyêko ciwîyayê, heq nêkerdê. Nurşene û keyeyê ci, koçê dewêka bîne ke merdimê aye ciwîyenê kerdî û vat, nêwaştêne dewa xo terk bikerê û xeylêk lebate kerdê ke selahîyetdaran dir pêvînayîş bikerê la îmkan nêdayê înan û vat: "Verê ke waştişê ma bimusê, 70 hezarî semedê keye û ersayê ma neql kerdê hesabê mêrdeyê mi rê. Keye ê ma yo, ersa ê ma yo. Gelo vera ci 70 hezar o. Her çî hetêk ra ma nêwazenê dewa xo terk bikerê."

 

'Êdî Heskîf çin o'

 

Nurşene da zanayene ke mêdeyê aye dewe de masegirî kerdêne û cuya xo wina dewam kerdêne û vat: "Kar çin o. Gelo do nika mêrdeyê mi se bikero? Ma nan û keyeyê xo ra bî. Ma tena nîyê. Nika dewe de her kes binê xeterî de yo. Domanê ma heta şan de teber de kay kenê. Awe heta verê keyeyê ma ameya. Domanê ma bikewê mîyanê awe do se bibo? Tu tedbîr nînê girewtene. Êdî cayêko bi nameyê Heskîfî çin o."