Rengîn Azîzoglu

 

AMED - Endama OHDyî avûkat Ozum Vurgune dîyar kerde ke pêro heqê ke qanûno hûmara 5271 de seba hepsîyan ameyo naskerdene, ganî seba Rayberê PKKyî Abdullah Ocalanî û hepsîyê bîn zî bi ca bêro û vat: “Mîyanê şaşîyêko huqûqî de yê. Nê îhlalkerdene welat girewtê bênê tesîrê xo. Ganî ma tecrîd her wext bîyarê ziwan û ma bikerê rojeva xo ya sereyîn.”

 

Rayberê PKKyî Abdullah Ocalanî oyo ke zindanê Berz yê Tîpê F yê Îmralî de tepişnayeyo, dimayê 8 serran qedexeyê pêvînayîşî bi grevê vêşanîye û rojeyê mergî dir pêvînayîş bi Abdullah Ocalanî dir ame kerdene. Dimayê 5 pêvînayîşê bi Abdullah Ocalanî dir 7ê tebaxa 2019ine ra heta nika cewabê muracatan nêdayê. Avûkata Komeleya Huqûqnasê seba Azadîye (OHD) Ozum Vurgune derheqê babete de şîrove kerde.

 

‘Pêro komel yeno tecrîdkerdene’

 

Ozum serê rewşa hepsî Veysî Aktaşî de vinderte û vat, qedexeyê bêdem ê girewtişî ser o zanayîş dayê û wina vat: “Qanûn de çîyêko winasî çin o. Kesêko nêeşkeno rastê nê ceza bêro. No îşkence yo. Rewş û sûcê hepsî çi beno wa bibo, heqê ci esto ke bi avûkatanê xo dir pêvînayîş bikero. No vera Pêameyîşê Heqê Merdiman ê Ewropa û madeyê destûrê bingeyîn o. CPT ke şibi Îmralî di serrî dima rapor weşan kerd. Ma rapor de cigêrayîş kerd û ma bi raporêko hetgirê îqtîdarî dir ameyî rîbirî.”

 

‘Tena şarê Kurdî tecrîdî ra tesîr nêbeno’

 

Ozume arde ziwan ke tecrîd tena serê şarê Kurdî ser o nêbeno û wina vat: “Cezakerdene, qedexeyê pêvînayîşê bi keye û avûkatan dir binê kamerayan de kerdene zî tecrîd o. Manîpule kenê. Tecrîd serê Abdullah Ocalanî û hepsîyê bînan vera pêro komel û şarê Kurdî yo. Abdullah Ocalan pêvînayîşê peyîn de vatibi do hewteyêko de rewşa pêrodayene werte ra wedarno. Vindertişê ci zaf zelal bi. Her wext bi hawayêko zelal ramojna ke eşkeno metodê aştîyane vejo werte. Sebebê dewamkerdene pêrodayîşan îqtîdar o.”

 

‘Ganî tecrîd babeta sereyîn bo’

 

Ozume tewr peyîn qiseykerdene xo de wina vat: “Çîyê ke ewro bêro kerdene; ganî tecrîdê serê Birêz Ocalanî û pêro hepsîyan bêro wedaritene. Ganî ma her wext tecrîd bîyarê rojeve û gerek bibo rojeva ma ya sereyîn. No zî tedayê komel û sazgehê komelê sivîlî eşkeno bêro bi caardiş. Her wext bîyarê ziwan û ma bikerê babeta xo ya sereyîn.”