Berîtan Canozer

 

AMED - Cinîya bi nameyê Melîke Demîroke qezaya Peyasî ya Amedî de hetê camêrdo ke ey dir zewicnayîbî Gokhan Demîrokî ra ameye qetilkerdene û 31 rojî yo ke hema kiştoxê aye nêameyo tepiştene. Melîkeye rojêk verê hedîse, seba şîdetî muracatê qerekole kerdebî û ame zanayene ke derheqê polîsê ke Melîkeye bi Gokhanî dir eşrawitê keye, tu çîyêk nêameyo kerdene.

 

15ê Çele de Gazîlerê Peyasî yê Amedî de Gokhan Demîrokî, cinîya bi nameyê Melîke Demîroke bi hacetê birnayene qetil kerdib. Merdimê Melîkeye ke zanayîş aye ra nêgirewtibî şîbî keyeyê aye û hedîse vejîyabi meydan. Gokhan Demîroko ke Melîkeye qetil kerdib 30 rojî yo hema zî nêameyo tepiştene.

 

Sereka Komeleya Cinîyan a Rosa, Adalet Kayaye derheqê babete de qisey kerde û dîyar kerde ke kiştişê Melîkeye, nêzdîbîyayene komel û dewlete vera kiştişan reyna ramojneno û wina vat: "Ma reyke bîn, bi sîstem û bi pederşahî ameyî têhet. Melîkeye zî sey cinîyanê bînan, nêameye pawitene. Melîkeye serrêka verê wazena fek nê camêrdî ra vera bido, labelê keye nêverdeno. 8ê Çele de vera mêrdeyê xo şîdet vînena û şîdetî ra ver Melîkeye xo erzena teber û 5 rojan keyeyê embaza xo cinî de nimnena. Dima ra serê muracatê mêrdeyê ci şina qereqole û aye teslîmê mêrdeyê ci kenê û eynî şewe hetê mêrdeyê xo ra yena qetilkerdene."

 

'Wareyê ke cesaret dano camêrdan akenê'

 

Adalete da zanayene proseso ke Melîkeye cuyaya, netîceyê ferasetê mekanîzmayê îdarî yo û qiseykerdene xo wina dewma kerde: "Goreyê pêameyîşê Stenbol û qanûnê hûmara 6284î ganî Melîkeye biameyne pawitene. Melîkeye zî sey cinîyanê bînan, hetê mêrdeyê xo ra ameye qetilkerdene. Wareyê ke cesaret danê camêrdan awan kenê. Melîkeye emrê qij de yena zewicnayene. 16 serrî de zewicyaya. No zî ramojneno ke zewacê emrê qij de açeryenê trajedî. Labelê ewro vernîya zewacê emrê qij de yenê akerdene." 

 

'Ma do dewa taqîb bikerê'

 

Adalete peynîya qiseykerdene xo de arde ziwan ke heta nika nêtepiştişê kiştoxê Melîkeye parçeyêko zîhnîyetê dewlete yo û vat: "Kiştox 30 rojî zêde yo vindî yo. Derheqê polîsê ke Melîke eşrawitê keye de zî tu çîyêk nêameyo kerdene. Ma cinî ma do taqîbkerdoxê nê dewa bê."