MÊRDÎN - Vahîbe Dumana ke qedexeyê vejîyayîşêteberî yê Nisêbînî de keyeyê ci zirar dî û ame rijnayîş, ser de TOKÎ ame viraznayene, dîyar kerde ke gelo kam wazeno serê cayo ke gonî ameya rijnayene, biciwîyo û vat, hîrê serrî yo zirarê ci nêameyo tespîtkerdene.

Vahîbe Dumane dîyar kerde ke keyeyê aye taxa Zeynel Abîdînî de bî û vat, hîrê serrî yo kîra de ciwîyena.  Vahîbeye vat serrê 90an de çend rey dewa înan ameya veşnayene û ameyê surgunkerdene û vat: "1993 de dewa ma ya Elqê ameye veşnayene. Wextê verên ewil ê şewatî de îşkenceyê girdî bi ma kerdî. Ma veşnayîşê vernê de dewa xo terk nêkerd. La di serrê ra dima reyna ameye veşnayene. Dima ra ma vejîyayî. Ma ameyî Nisêbîn. Ma taxa Zeynel Abîdîn de bi ca bî. Ma bi kedêka pîl keye da ro. 6 serrê ma keye de derbaz bi, na rey zî qedexeyî dest pêkerdî. Heta peynîya qedexeyan ez keyeyê xo de menda. Roja peyîne ez mecbur menda vejîyî."

'Keyeyê mi ame rijnayene'

Vahîbeye va ke dimayê peynîbîyayene pêrodayîşan, ageyraya qeza û vat: "Keyeyê mi ke tu xisarê ci çinbi, bi derbeyêko kelepçeyî ame rijnayene. Ez û lajê xo o wext Wan de mendî. Dimayê ke qedexeyî ameyî wedaritene ma ageyrayî.  Keyayê taxe vat, keyeyê şima saxlem o. Tena cam û beran zirar dîbi. La dorê taxe bi têlan ame qblûqakerdene û keyeyê ma saetêka de ame xirakerdene. Wexto ke ma ameyî tu çîyêk nêmendib. Ez 40 serrî ya û bi hîrê rey keyeyê mi yeno rijnayene."

'Ma yenê mexdûrkerdene'

Vahîbeye vat, awanîyê ke serê ersa înan de ameyê viraştene qebul nêkerda û vat: "Wexto ke vatî ma do serê ersa şima de TOKÎ vêraznê, ma îmza nêda. Hema zî xeylêk keyeyê ke îmza nêdayê estê. Gelo kam serê cayê ke gonî rijyaya de eşkeno biciwîyo. Hîrê serrî yo tapoyê ma destê ma de yo û ma yenê mexdûrkerdene. Ma nêzanê do se bibo. Ma nê mexduriyetî qebul nêkenê."