STENBOL- Maya hepsîyo nêweş Selman Akpinarî, Koçer Akpinare dîyar kerd ke gumanbarê qirkerdişê Sêwasî hetê serekkomar yenê efûkerdene û veradayene, la lajê aye nêbenê nêweşxane û vat: "Êdî bes o, gelo çi heqê înan esto nê zulmî ma ser o bikerê? Ganî têduşt nêzdîyê hepsîyan bibê."

Goreyê Komîsyonê Zindanan ê ÎHDyî, zindanan de  457 ci ra giran, pêroyî de hezar û 333 hepsîyê nêweşî estê. Hepsîyê ke pêwa raporê înan yê STE û nêweşxaneyî estê zî serbest nînê veradayene.

Gumanbarê qirkerdişê Sêwasî Ahmet Turan Kiliçî, hetê  serekkomarî ra bi sebebê problemê ey yê weşîye estê, zindan ra ame tehlîyekerdene. Dimayê nê rewşa hepsîyê nêweş reyna ame rojeve. Yew hepsîyo nêweş Selman Akpinaro û zindanê  Edîrneyî de yeno tepişnayene.

 ‘Di serrî hucre de mend'

Maya ey Koçere dîyar kerde le lajê ci, teşrîna peyêne 2009ine de tepişnaye yo û xeylêk rey ameyo surgunkerdene û vat: "Stenbol ra surgunê Tekîrdagî, uca ra reyna surgunê Stenbolî kerdê. No 6 serrî zêde yo Edîrneyî de tepişnaye yo. Mabêne 2012-2015 de hucre de mend. Nêweşîya ey uca ra dest pêkerd. Nêweşîya ci Vertîgo ya. Dewxe ey şîne û mîdeyê ci gineyne têmîyan ro, serê hişê xo ra şîne. Seba ke tena bi, kesî mudaxale zî nêkerdêne. Dermanê ci nêameyne dayene."

'Nêbenê nêweşxaneyî'

Koçere da zanayîş ke Selman wexto ke grevo vêşanîye de bi, engiştê lingan ra emelîyat bîyo û seba ke grev de bîyo, dermanê ci nêdayê û vat: "Dejê pîl ciwîya, xeylêk kîlo vindî kerd. Dimayê grevî wedarnabî nêweşxaneyî. Maya mi ey şî pêvînayîşê ey. Nêameyne naskerdene. Nêeşkayne qisey bikero. Waştişê ci nînê bicaardene. Selman nîno dermankerdene. Nêbenê nêweşxane. Pêwa ke vano zî nêbenê."

'Puncê ke mi berdî zî nêdayê'

Koçere bale ante serê îhlalkerdene heqan û wina vat: "Seba lingê ey emelîyatkerdeyê nêbaş ê. 5 mengî yo nêeşkana şêrî verê ci. Kewt grevê vêşanî. Nêweşxane de mend. Puncê ke mi berdî bî zî nêdayê ci. Vatî bi posta bieşrawê. Heta ke hepsîyan benê nêweşxane înan hal ra vejenê. Dermanan zî bi hawayêko kêfî danê."

Koçere reaksîyon vera veradayîşê gumanbarê Sêwasî zî da û vat: "Yê ke zîhnîyetê înan rê yê, înan serbest vera danê. La domananê ma terorîst îlan kenê. Wa Homa heqê ma înan rê nêverdo. Gerek têduşt nêzdîyê hepsîyan bibê."