Medîne Mamedoglu

 

MÊRDÎN - Cinîyê esnafî dîyar kerdî ke seba krîzî nêeşkenê debara xo bikerê û vatî ganî selahîyetdar, lezabez na rewşe çareser bikerî.

 

Tirkîya ke krîzê ekonomî roj bi roje giran beno, tesîrêko pîl serê şarî de keno. Eynî wextî de yê ke tewr zaf tesîr benê esnaf ê. Cinîyê Mêrdînî bazarê esnafîye kenê, dîyar kerdî ke ê ameyê sewîyeya ke tezgahê xo wedarnê.

 

'Ganî çareserî bêro vînayene'

 

Gulcan Akyuza ke bazar de cil û belgan roşena vat, 4 serrî yo nê karî kena û wina dewam kerde: "Ma qezencê rojane tena eşkenê pê nan berê keyeyê xo. 4 serrî yo tezgahê xo tîya akena. Karê ma nê prosesî de qet baş nîyo. Ma nêeşkenê çîyêk biroşê. Yê ke yenê zî seba çinbîyayîşî, nêeşkenê çîyêk bikerê. Pereyê kesî çin o. Coka ma nêeşkenê debara xo bikerê. Yê mi domanêka/o mi esta/o. Gelo keyeyê ke domanê înan zêdeyê se kenî? Esnafê ke îflas kenê estê. Roj bi roje nê zêde benê. Ganî selahîyetdarî çaresîyêko bivînê.

 

'Berardişî destê ma de manenê'

 

Esnaf Ayşe Dumane zî berardişê tuhafîye roşena û vat: "Tezgahê ma roj bi roje qij beno. Berardişê ke ameyne rotene, nika pêro serê tezgahan de manenê. Verê ma xeylêk berardiş girewtêne. Nika ma tena 5 yan zî 10 heban gênê. Tewir zêde bî, la nika nînê rotene û destê ma de manenê. Keyeyî nêeşkenê domananê xo rê çîyêk bigîrê. No zî zirarêko pîl dano ma. Ez 12 serrî ra heta nika nê bazarî de xebityaya. MErdimî tena êdî werdê xo gênê."

 

Gulîstan Ertema ke bi serran o hem wanena û hem xebityena, seba ke tayînê aye nêmaeyo kerdene bazar de xebityena û wina vat: "Ma bi keyeyî nê karî kenê, la ma ma nika bi zor nan benê keye. Hem kar çin o, hem rotiş çin o. Ma pereyê awe û ceyranî bi zor danê. Cêbê hemwelatîyan de pere çin o. Tewr zêde zî cinî tesîr benê. Bi taybet esnafê cinî nêeşkenê debara xo bikerê."

 

Şevkîya Kaya zî reaksîyonê xo wina arde ziwan: "Mi verê erebokê xo pirrî werd kerdêne. La nika nêeşkena çîyêk zî bigîrî. Pêwa ke ma nêeşkenê bigîrê, pere zî çar qat şino. Ma her het ra mexdûr benê. Ma nêeşkenê nan bêrê keyeyê xo. Wa êdî no krîz peynî bibo. wa merdimî boya xo bigîrê."