STENBOL - Avûkatê Rayberê PKKyî Abdullah Ocalanî, seba ke bi muwekîlê xo dir pêvînayîş bikerî, muracatê Serdozgerîya Komare ya Bûrsayî kerdî.

 

Avûkatanê Rayberê PKKyî Abdullah Ocalanî ke Zindanê Asayîş Berzî yê Tîpê F yê Îmralî de tepişnaye yo, Razîye Tûrgût, Rezan Sarica, Serbay Koklu û Îbrahîm Bîlmezî semedo ke bi muwekîlê xo dir pêvînayîş bikerê, muracatê Serdozgerîya Komara ya Bûrsayî kerdî.

 

Avûkatê Abdullah Ocalanî, Newroz Ûysal û Rêzan Sarica, 2ê Gulane, 22ê Gulane, 12ê Hezîrane, 18ê Hezîrane û 7ê Tebaxa 2019an de şîbî Îmralî ey dir pêvînayîş kerdibî. Avûkatî 7ê Tebaxa 2019an heta nika her hewte sereyê muracatê dozgerîye danê, la heta nika pêro muracatê înan bêcewab manenê.