AMED - Melîke Canliye derheqê Tuncay Kaltaro ke 6 serran bi hawayêko sîstematîk aye tehdîd û tacîz kerd de dewa akerd û roniştişê hîrêne de zî derheqê Tuncayî de qerarê tepişnayene nêvejîya. Melîke Canliye reaksîyon ramojna û vat, hukm zî cinîyan nêpaweno.

 

Melîke Canliya 28 serrî ke Îzmîr de ciwîyeyîne, seba şîdet û tacîzo ke amî rîbirî Amed de bi ca bî. Melîkeye dîayr kerde ke aye rastê her tewir şîdetî ameya û sazgehê cinîyan ra hetkarî waştebî. Melîkeye derheqê camêrdo bi nameyê Tuncay Kaltarî (42) ke pîyê hîrê domanan bi û her wext tehdîd û tacîz vera ci amebi kerdene, 10 rey qerekol û 10 rey zî dozgerîye rê gerre kerda. La pêwa nê kes nêame cezakerdene û cuya Melîkeye ageyra zindan.

 

Roniştişê aye vizîrî 12in Dadgeha Cezaya Giran ya Amedî de ameye vînayene. Semedê gumanbarî  sûcê ‘tehdîdî’ 8 mengî, sûcê ‘tacîzê cinsî' serrêke û 6 mengî û sûcê ‘rehetîyê kes û merdimê aye xirakerdene ra' 8 mengî, yanî bi pêroyî 2 serrî û 10 mengî ceza birna. Verpayê ceza, qerar ame dayene ke bêtepişnaye bêro muhakemekerdene. Avûkatan îtîraz kerdî û dîyar kerdî ke verê zî 13 serrî cezaya ameya tesdîqkerdene yê gumanbarî esta.

 

'Cuya aye açerya zindan'

 

Melîke û keyeyê aye reaksîyon vera rewşe dayî. Melîkeye wina vat: "Gelo pawenê ke ez bimrî. Qerar ra qet razî nîya. 6 serre bi desan rey mi gerre kerd. La cazayêka heq bikero nêdayî. Nê kesî serê birayê mi de hesabêko sexte akerd. Serê hesabî ra mesaj eşrawito bi desan kesî rê. Mesaj eşrawito waştîyê mi rê zî. Fotografê mi çapemenîya komelî de pare kerd û ez teşhîr kerda. Pêro merdimê mi rastê tehdîdî yenê. Kesê ke nas nêkena, seba peynameyê ma bi eynî mesajî eşraweno û ma tehdîd keno. Dimayê ke mi ci ra fek vera da, mi hacetê xo yê taybet nêgirewtî. Pasaport û belgeyê wendegehê mi desteser kerd. Ma tersan ra Amed rê bar kerd. Her wext tehdîd kerdêne. La pêwa nê hema zî serbest geyreno."

 

'Sazgehê cinîyan û rojnamegeran ez tena nêverdaya'

 

Melîkeye da zanayîş ke heta nika vatêne qey belkî tena ya û coka nêwaşta ke nameyê xo bida eşnawitene û vat: "La êdî tena nîya. Serê vengdayene mi sazgehê cinîyan û rojnamegeran xo resna mi. Vizêr roniştiş de sere de Komeleya Cinîyan a Rosa, pêro sazgehê cinîyan estbî. Rojnamegerî estbî. Ez qerarê dadgehe rast nêvînena. Qanûnê ke cinîyan pawenê çin ê. Sey mi bi seyan cinî bendeyê pawitîşî yê. La wa kes nêterso, ma yew zî tena nîyê."