Dîlan Babat

 

ENQERE - Temsîlkara Serekîya Pêroyî ya EMEPî Şukran Dogane, derheqê rewşa hepsîyê nêweş û yê ke zindan de wefat kerdê ser o qisey kerde û vat bi hawayoko fîîlî cezaya mergî yena ferzkerdene."

 

Goreyê dayeyê ÎHDyî, zindananê herême û Tirkîya de 45 ci ra giran, bi pêroyî hezar û 333 hepsîyê nêweşî estê û tena 2019an de 50 hepsîyê nêweş zindanan de wefat kerdê. Tewr peyîn 25ê Çele de zindanê Tîpê F yê Tekîrdagî de Huseyîn Polatî wefat kerdib.

 

Temsîlkara Serekîya Pêroyî ya EMEPî Şukran Dogane, derheqê hepsîyê nêweşan de û yê ke wefat kerdê de şîrove kerd.

 

Sebebê ‘nêweşxane de oda çin a'

 

Şukrane arde ziwan ke xeylêk hepsîyê nêweş yê ganî lezabez serbest bêrê veradeyene estê û wina vat: "Xeylêk hepsîyan, zindan de wefat kerd. Tewr peyîn Huseyîn Polatî wefat kerd. Pêwa ke gonî kewtebî serê mîdeyê ci, nêweşxane de tedawîya ci nêamebî kerdene. Bi îdiayê ke nêweşxane de odaya veng çin a, oda nêdîyabî ci û tedawîya ci nêweşxane de nêamebî kerdene."

 

'Tedayan kenê'

 

Şukrane dîyar kerde ke rewşa hepsîyan çiqas giran bo zî, nînê tehlîyekerdene û hewl danê ke nê ser komelî ser o teda bikerî û bi hawayêko fîîlî merg hepsîyan rê ferz kenê. Şukrane wina dewam kerd: "Vera hepsîyê nêweşan bêvengî esta. Seba zindanan hewldayîşêko taybet ganî bibo. Pêroyê îqtîdarê AKPyî de hûmara hepsîyan sera 285 zêde bî û sebebê nê zî tepişnayîşê wezîfedarê HDPyî û hemşaredaran o. Seba hepsîyê nêweş bêrê tehlîyekerdene zî ganî vengê şarî hîna zêde xurt vejîyo."