Habîbe Eren

 

ENQERE - Yew gumanbarê qirkerdişê Sêwasî Ahmet Turan Kiliç, hetê serekkomar û serekê AKPyî Recep Tayyîp Erdoganî ra amebi efûkerdene. Zeynep Altioke reaksîyon vera rewşe da û dîyar kerde ke, semedê gumanbarê qirkerdişî her wext şertê taybet ameyî caardene û wina vat: "Merhemeto ke semedê xeylêk kesê ke zindan de yê û nêeşkenê cuya xo dewam bikerê bi ca nîno, semedê kesêko bi ca yeno."

 

Otêla Madimakî ya Sêwasî de, 2ê temuza 1993ine de qirkerdiş ame kerdene û mîyan de hunermend, şaîr û nuştoxî zî estbî, 35 kesî cuya xo vindî kerdî. Ahmet Turan Kiliço ke semedê qirkerdişî rastê cezaya muebetî ame, bi sebebê weşîye ey, hetê serekkomar Tayyîp Erdoganî ra cezaya ci ameye wedartene. Eynî wextî de dewaya derheqê hîn kesê bînan de zî seba demvîyarteyî kewte. Dewaya gumanbarê fîrarî yê bi cezaya muebetê giran yenê muhakemekerdene Murat Karataş, Eren Ceylan û Murat Sonkur zî hema Yewin Dadgeha Cezaya Giran ya Enqereyî de dewam keno. 18ê adara 2020 de roniştişêko newe yeno vînayene. Kênaya şaîr Metîn Altiokî yo ke Madimak de ame qetilkerdene, Zeynep Altioke reaksîyon vera efûkerdene gumanbarê qirkerdişî da.

 

Zeynebe arde ziwan ke 26 serrî yo dewaya qirkerdişê Sêwasî de edalet bi ca nîno û wina vat: "Ganî proses de sûcê merdimayî kewt verê demvîyarteyî. Ma o wext vat, 'ganî sûcê merdimayî, nêkewê vera demvîyarteyî' û ma vat, ganî no destûrê bingeyî rê bêrê neqlkerdene. Ma vatêne do demvîyarte çinbo, la ma qet nêvatêne do serekkomar semedê sûcê merdimayî efû bîyaro."

 

'Serekkomarêko qirkerdiş ra razî yo, esto'

 

Zeynebe qiseykerdene xo wina dewam kerde: "Ma vera nê ra mat nêmendî. Sere ra serekkomar, gumanbaran mexdûr vînayne. Serekkomarêko ke, demvîyarte ra dewa ra razî û nê bi ‘xêr’ vîneno esto. Nê efûyî bi tu hawa nînê qebulkerdene."

 

'Merhamet semedê yew kesî bi ca yeno'

 

Zeynebe da zanayîş ke do heta peynî têkoşînê xo dewam bikerê û wina vatene xo wina qedêna: "Caardişê peymeyê huqûqî esas ê. Eke dewletêka huqûqî ya, do xora nê mekanîzmayî bi ca bêrê. Mecbûr a ke ma bale biancê serê bêheqî yê tîya de. Nimûne, raya pêroyî de ame vatene ke Selahattîn Demîrtaş bi hawayêko giran nêweş o zî, destûr nêdayî ke sewqê ci bêro kerdene. Xeylêk kesê ke zindan de lazimîyê înan bi ewnîyayîş estê, nêeşkenê cuya xo dewam bikerê estê. Merhemet semedê înan nîno ramojnayîş û no zî zaf bi naqokî yo. Semedê gumanbarê qirkerdişî, her wext şertê taybet ameyî bi caardene. Tu hetê nê bêro qebûlkerdene esto."