'Omidê ma zaf ê, yew înan ra zî agerayîşê şaristanî yo'

  • 13:12 3 Sibate 2020
  • NAROJANE
Rojda Seyidxan
 
QAMIŞLO - Maya bi nameyê Xanim Mustafa ke şaristanê Girê Spî yê ke seba hêrişê dewleta tirkî di rey koçber bîya, qisey kerde û wina vat: "Seba hêrişê dewleta tirkî, ez û domanê xo, ma dûrî yewbînan kewtê. Omidê zaf ê, ma do ageyrê şaristanê xo."
 
Dewleta tirkî û komê girêdayê aye, vernîya çimê pêro dinya de hêrişê herra vakur û rojhelatê Sûrîye kerde. Netîce de bi hezaran şar, Serêkanî û Girê Spî ra mecbûr mend koç bikerê û kampan de cuya xo dewam bikerê. Yew înan ra zî maya bi nameyê Xanim Mistafaya ke 70 serrî ya û Girê Spî ra ya. Xanime kampa Newroze ya şaristanê Dêrikî ya girêdayê kantonê Qamişloyî de manena. Xanime hîkayeya koçberkerdişê xo ma dir pare kerde.
 
'Dewleta tirkî bi hawayê xidar hêrişê ma kerd'
 
Maya Xanime koçberîyê xo ma rê wina pare kerd: "Dewleta tirkî bi tang, top û teyareyan bê mabên hêriş kerd û bi hezaran merdimî kiştî. Ez û domanê xo mecbûr mendî şaristanê Girê Spî ra vejîyê. Wexto ke ma vejîyayî, ma dî bi hezaran kes seba hêrişî vazdanê û bajar ra vejîyenê. Ma a şewe çol de mendî."
 
'Ma hêriş tu kesî nêkerdo'
 
Maya Xanime serê wehşîyê dewleta tirkî ser o qisey kerde û vat: "Dewleta tirkî û çeteyê aye bi hawayêko wehşî, hêrişê ma kerd. mal û pêro hacetê ma xo dir berdî. La ma nêşî keyeyê tu kesî. Do dewleta tirkî rê nêmano û do bedelê nê wehşîyan bido."
 
'Semedê nêweşîyan, lazimîyê ma bi dermanan esto'
 
Maya Xanime lazimîê xo wina arde ziwan: "Dimayê ke ma şewêke çol de mendî, ma verê xo da Reqa, ma keyeyêko xirabe de mendî. Ûca de ciwîyayîş çinbi û ma verê xo da kampa Newroze ya şaristanê Dêrikî. Bi mengêke yo ma ameyê kampe, cuya ma kampe de baş derbaz bena. Ez û mêrdeyê mi ma nêweş ê, coka lazimîyê ma bi germbîyayîş û dermanê ke nînê peydakerdene estê."
 
'Bi di rey dewleta tirkî hêrişê ma kena'
 
Maya Xanime, mîyanê qiseykerdene xo de qalê verê 7 serran kerde û va: "Verê 7 serran zî dewleta tirkî reyna bi wehşîyêk pîl hêrişê ma kerd. Ma bi zehmetî ganê xo xelas kerd. Her domanêk ma şî cayêko, ma yewbînan ra dûr kewtî. La ma bi omid ê, ma omid kenê ageyrê bajarê xo."