Zeynep Durgut 

 

ERZIROM - Taxa camîkebîrî bi serran o pêro awa lêşin û çopê derûdorê keweno robar, roj bi roj lêşînî zêde beno û boya ke vejîyena bena sebebê nêweşîyan. Welatîyê taxe, nêrazîbîyayîş ramojnayê nêpakerdişê robar dayî û veng dayî rayedaran ke verê problem nêbo sebebê nêweşîyê giranî wa bêro çareserkerdene. 

 

Qezaya Xoresanî taxa camîkebîrî bi serran o problemê Robarî nînê çareserkerdene. Robarê ke taxa de herikêno, mîyanê newala Arasî tesîrêko negatîf serê derûdor û welatîyê derûdorî keno. Her roje lêşinî zêde beno û pêro sozê pakkerdişê robarî ameyî dayene la hema zî nêame bi ca. Welatîyê taxe nişnenê ro reaksîyon vera şaredarî û selahîyetdaran dayî û vatî seba boya robarî derûdorî vila keno û nêeşkenê keyeyê xo ra vejîyê. 

 

'Ma şaredarî ra razî nîyê'

 

Welatîyê ke taxe nişnenê ro reaksîyonê xo ramojnayî û vatî ke çareserîyêko bêro vînayene. Welatîyan ra Sevgî Paça qisey kerde û wina vat: ”Mewsîmê wisarî de ma seba boye nêeşkenê keyeyê xo ra vejîyê. Her mewsîm de boye nêeşkenê keyeyê xo ra vejîyê. Her mewsîmê wisarî de robar pirr beno û ser de qelibîyeno. Keyeyê ma binê awe de bimenê. Hamnanî zî seba seba boya ke robar ra yeno, domanê ma nêweş keno. Ma seba boya nêweş, ne eşkenê nan biwerê û ne zî ma eşkenê keyeyê xo de roşê. Her tewir çop robar rê yeno vilakerdene û no zî beno sebebê lêşinî. Ne robar gênê û ne zî lêşinîyê robarî pak kenê."

 

'Bi 18 serrî ke ma nê problemî ciwîyenê' 

 

Mîne Arslane derheqê babete de wina vat: "Pêro awa derûdorî kewena no robarî. No robar vernîya nêweşîyan akeno. Ma na boye ra zaf aciz ê. Domanê ma her wext nêweş ê û nêweş kewenê. Bi 18 serrîyo ke na taxa de nişne ro û bi 18 serrî ma nê problemî ciwîyenê. Ma hezar rey şî şaredarî, la problem çareser nêkerdî. Her rey ke ma şinê vanê, ma do çareser bikerê, la çareser nêkenê. Ez veng dana selahîyetdaran ke no robarî wa yan pak bikerî yan zî padê."

 

'Bi serran o nê îşkence bi ma kenê'

 

Cinîyan ra Elîf Bulute zî nêrazîbîyayîş xo ramojna û veng dayî selahîyetdaran ke problemê robarî çareser bikerê û qiseykerdişê xo wina qedêna: ”Ez 11 serrî na taxe de nişnena ro. Bi serran o nê îşkenceyî bi ma kenê. Pêro lêşinîyê taxe heriknenê robar. Mengê hamnanî de ma nêeşkenê keyeyê xo de vinderê. Selahîyetdarî problemê ma rê nêbenê çareser. La vera ke problem bibo sebebê nêweşîyan ganî bêro çareserkerdene.”