Semedê vîrusê Korona rewşa lezabeze ame îlankerdene

  • 14:17 31 Çele 2020
  • NAROJANE
MERKEZÊ XEBERAN - Çîn de hûmara merdimanê ke vîrusê Korona ra merdî resaye 210. Rêxistina Weşîye ya Dinya (WHO) warê mîyanneteweyî de rewşa lezabeze îlan kerde.
 
Vîrusê Korona peynîya menga kanûne de şaristanê Wuhanî yê Çînî de vejîya meydan û her roje cayêkê bînî yê dinya de nêweşîyêka vîrusî yena dîyene. Hûmara merdimanê ke vîrusê korona ra mirenê bena zêde.
 
Herêma Hubeiyî de ke Wuhan zî tede ya vizêr şan 42 kesî merdî. Bi nê hawayî hûmara mergan resaya 212 kesan. Zaf cayanê Çînî de 20 welatan de 8 hezar 100 kesî vîrusê Korona ra nêweş kewtî. Na hûmare zî her roje zêdîyena. Almanya de hûmara nêweşan bîye 5 kesî. Îtalya de di kesan de vîrusê Korona ame tesbîtkerdene. DYA de 170 kesan de vîrusê Korona ame tesbîtkerdene.
 
Rewşa lezabeze ame îlankerdene
 
Rêxistina Weşîye ya Dinya (WHO) reya verêne 10ê çeleyî de derheqê vîrusî de zanayîşî pare kerdî û hewteyê vîyarteyî de zî hewce nêdibi ke warê mîyanneteweyî de rewşa lezabeze îlan bikero. Labelê nika warê mîyanneteweyî de rewşa lezabeze îlan kerde. WHOyî eşkerayîya xo de bale ante girîngîya xîretanê Çînî ser. Bi wesîleya rewşa lezabeze welatanê endamanê WHOyî ra ame waştene ke bi tebdîrê hemparî pîya têbigêrê. Labelê qedexeyê bazirganîya bi Çînî rojdem de nîyo.