Ebrû Gunay:Rejîma qeyûm li welat belav dikin

  • 13:57 8 Çile 2021
  • Ramyarî
ENQERE - Berdevka HDP’ê Ebrû Gunay, di civîna çapemeniyê de bal kişand ser tayînkirina qeyûman û wiha got:"Îro rejîma qeyûm li welat belav dikin. Tekane çareseriya vê yekê jî têkoşîna bi hev re û tifaqa demokratîk e."
 
Berdevka Partiya Demokratîk a Gelan (HDP) Ebrû Gunay, li Navenda Giştî ya partiya xwe civîna çapemeniyê li dar xist û rojevên heyî nirxandin. Ebrû, nûçegihanê Rojnameya Evrenselê Metîn Goktepe yê ku di 8’ê Çileya 1996’an de, di dema şopandina nûçeyê de hatibû binçavkirin û dûre hat qetilkirin bi bîr anî û wiha axivî: "Berî 25 salan, Metîn Goktepe ji aliyê polîsan ve hat qetilkirin. Me Goktepe û şehîdên çepmeniyê ji bîr nekirine. Pêşerojeke azad ava kirin jî berpirsiyartiye me ye. Qatilên Goktepe diyar bûn. Ji bo ku rastî dernekevin holê, ji aliyê desthilatdariyê û hêzên girêdayî wê ve hat qetilkirin. Em Goktepe carek din bibîr tînin."   
 
'Em ê destûrê nedin komkujî di tarîtiyê de bimîne'
 
Ebrû, Komkujiya Parîsê jî bi bîr xist û wiha got: “Di 9’ê Çileya 2013’an de, li Parîsê siyasetmedarên jin ên kurd Sakîne Cansiz, Leyla Şaylamez û Fîdan Dogan hatin qetilkirin. Bi ser qetilkirina wan re 8 sal derbas bûn. Ev komkujî, berî her tiştî, li dijî vîna çareseriyê û lêgerîna aştiyê ya gelê Kurd pêk hat. Ev komkujî, komkujiyek navneteweyî bû. 8 sal in ev komkujî nayê ronîkirin. Lê em bersûcên vê komkujiyê baş nas dikin. Çi dibe bila bibe, em ê destûrê nedin ku ev komkujî di tarîtiyê de bimîne. Têkoşîna wan dê her tim pêşeroja me ronî bike, hêviyê bide me û rêya rast nîşanî me bide.”
 
'Dixwazin alîgirên xwe dewlemend bikin'
 
Ebrû, diyar kir ku desthilatdariyê di sersala nû de êrîşî civakê kir û wiha pê de çû: “Desthilatdariya AKP û MHP’ê, di sala nû ya 2021’an de, hewl dide bi jêderkên civakê xwe dewlemend bike. Ji ber vê her tişt biha kirin. Bi vê dixwazin alîgirên xwe dewlemend bikin û civakê jî xizantir bikin. Di heman demê de mûçeya herî kêm ji bo karkeran diyar kirin. Her roja diçe bi leztir ji bêrîka welatiyan didizin. Ji dîrokê heya roja me ya îro, tu desthilatdariyeke evqas bi lez û bez dizîtiya berîka welatiyên xwe nekiriye.”
 
'Rejîma qeyûm li welat belav dikin'
 
Ebrû, da zanîn ku rejim krîzên nû ava dike û wiha bilêv kir: “Bi vê ber bi têkçûyînê ve diçe. Şer û pevçûnên li sala 2015’an ve li Tirkiyeyê rû didin li her derê belav bûye. Desthilatdariya bi konsepta şer nêzî pirsgirêka kurd dibe, bi tu awayî nikare serdestiya xwe ava bike. J iber vê yekê qeyûm tayîn dike. Herî dawî qeyûm tayînî zanîngehê jî kir. Rejîma qeyûm a ku ewil li bajarên kurdan xistin meriyetê, mîna rejîma tecrîdê dixwazin li hemû Tirkiyeyê belav bikin. Kelepçeya li deriye zanîngehê hat xistin, îro lê nehatiye xistin. Ew kelepçe, dema qeyûm tayînî şaredariyên kurdan hatin kirin, li deriyan xistin. Ew kelepçeya li vîna kurdan hat xistin, em ê tu carî qebûl nekin û her tim red bikin. Ev 5 salin em behsa van pêkanînan dikin. Niha jî em rast derketin. Îro rejîma qeyûm li hemû welat belav dikin. Tekane çareseriya vê yekê jî têkoşîna bi hev re û tifaqa demokratîk e.”
 
Îdianameya Kobanê
 
Ebrû, biryara Dadgeha Mafên Mirovan a Ewropayê ya ji bo berdana Hevserokê dîlgirtî yê HDP'ê Selahattîn Demîrtaş bi bîr xist û bal kişand ser qebûlkirina îdîanameya "Lêpirsîna Kobanê" ku Selahattin Demîrtaş, Fîgean Yuksedag jî di nav de li dijî 108 siyasetmedarên Kurd hate amadekirin.
 
Ebrû,  got, "Ev îdîaname nîşan dide ku dadgerî çawa ji aliyê desthilatdariya AKP-MHP'ê ve hatiye têkbirin. Îdîanameya di çarçoveya lêpirsîna Kobanê de hatiye amadekirin, encex bibe qapaxê kovarên pêkenokan "
 
Ebrû,  diyar kir ku ev îdîaname bêçaretiya desthilatdariyê jî radixe pê çavan û got, "Heta ku yên vê bêhiqûqiyê dikin derkevin pêşberî mirovahiyê û hesabê sûcên xwe bidin, em ê têkoşîna xwe dewam bikin."
 
Berdevka HDP'ê Ebrû Gunay destnîşan kir ku wê kevneşopiya berxwedanê ya partiya wan di sala 2021'ê de jî dewam bike û wiha bi dawî kir: “Her ku têkoşîna me bêeman dewam dike, berxwedana me bêrawestan dewam dike, desthilatdarî bêhtir tengav dibe û bêhti gefê dixwe. Lê belê ji bo gelên Tirkiyeyê di bin vê hilweşînê de nemînin em ê têkoşîna xwe dewam bikin. Partiya me li pêşberî êrişan gavan paşve neavêje, berevajî hîn bêhtir derbê li tifaqa faşîst a AKP-MHP'ê dixe.”