AMED - Lîsa Çalan a ku di teqîna mîtînga HDP'ê ya Amedê de 2 piyên wê jê bûn, daxwaza wê ya bibe mudaxîlê dozê ji ber tevliheviya "erkê" ya dozgeran bê biryar ma. 

 

Di 5'ê Hezîrana 2015'an de li dijî mîtînga HDP'ê ya Qada îstasyonê endamên DAIŞ'ê êrîşa bombeyî pêk anîbûn. Di bûyerê de 5 kesan jiyana xwe ji dest dan û bi sedan kes jî birîndar bûn. Yek ji van kesên birîndar Sînemevan Lîsa Çalan a di êrîşa DAIŞ’ê li dijî mîtînga Qada Îstasyonê pêk anî de, 2 piyên wê jêbûn e. Lîsa, ji ber 2 piyên wê jê bûn û seqet ma, doz vekiribû. Daxwaza Lîsa Çalan a bibe mudaxîla dozê ji ber dozgerên "Bê erk" bê biryar tê hiştin. 

 

Heta niha ne daxwaza Lîsayê pêk hatiye û ne jî ji bo mijarê îfadeya wê hat girtin. Dosya daxwaza Çalan ji ber dozgerên "Bê erk" di navbera dozgerên Amed û enqereyê de diçe û tê. 

 

Bêyî biryarê dosya neqil kirin

 

Piştî bûyerê li 5'emîn Dadgeha Cezayê Giran a Amedê doz hat vekirin. Lîsa Çalan xwest bibe mudaxîlê dozê û serî li Serdozgeriya Komarê ya Amedê da. Bêyî ku dozgerê Amede biryarê bide, dosya dozê hewaleyî Enqereyê kirin. Dadgeha bilind bi hinceta ewlehiyê dosya dozê sewqî 2'emîn Dadgeha Cezayên Giran a Enqereyê kir. Piştî dosya hat neqilkirin dozgerê Amedê bi hinceta ji dosyayê ne berpirsiyar û ne erkdar e biryar nade. Dozgerê Amedê der barê daxwaza dosyaya Lîsa Çalan de biryara "Bê erkiyê" da û daxwaz şand Serdozgeriya Komara Enqereyê. 

 

Enqere: Erk ya Amdeê ye

 

Serdozgerê Komarê yê Enqereyê, piştî serlêdana Lîsayê, biryara "Bê erkiyê" da û diyar kir ku ew ne peywirdar e û erk di destê Serdozgerê Komarê yê Amedê de ye û dosya şand ji Serdozgerê Enqereyê re. 

  

Piştî vê aloziyê 19'emîn Dadgeha Cezayên Giran a Enqereyê biryara Dozgerê Amedê red kir û destnîşan kir ku biryar û erk di destê Serdozgeriya Amedê de ye.

 

Piştî biryara 19'emîn Dadgeha Cezayên Giran a Enqere, dosya dîsa şandin Serdozgeriya Komarê ya Amedê.