ENQERE - Siyasetmedar Gultan Kişanak û Gulser Yildirim di çarçoveya "Lêpirsîna Kobanê" de îfade dan û biryara girtina Gultanê û "hepsa malê" ya ji bo Gulserê hat dayin. 

 

Hevşaredara Şaredariya Bajarê Mezin a Amedê ya berê Gultan Kişanak û Parlementera HDP'ê ya berê Gulser Yildirim, di çarçoveya "lêpirsîna Kobanê" de li Girtîgeha Kandirayê ya Jimare 1 a Tîpa F'yê bi rêya SEGBÎS'ê îfade dan. 

 

Gultan û Gulserê ku bi daxwaza girtinê sewqî Dadgeriya Ceza ya Sulhê ya 5'an a Enqereyê hatin kirin parastina xwe kirin. Piştî parastina Gultan, Gulserê û parêzerên wan, dadgeriyê der barê Gultanê de biryara girtinê da. Her wiha dadgeriyê der barê Gulserê de jî cezayê "hepsa malê" û berdana bi şertê kontrolkirina edlî da. 

 

Heya niha kesên di çarçoveya vê lêpirsînê de hatine girtin ev in: Hevserokên Giştî yên HDP'ê yên berê Fîgen Yuksekdag û Selahttîn Demîrtaş, endamê MYK'ê yê HDP'ê Alp Altinors, Endamê Komîsyona Karên Derve ya HDP'ê Nazmî Gur, parlamentera berê Ayla Akat Ata, Endamên MYK'ê yên HDP'ê yên berê Bîrcan Yorûlmaz, Berfîn Ozgu Kose, Dîlek Yagli, Cam Memîş, Gunay Kûbîlay, Bulent Parmaksiz, Pervîn Odûncû, Îsmaîl Şengun û Cîhan Erdal, Hesabgirê Giştî yê HDP'ê yê berê Zekî Çelîk, Endamê RTUK'ê yê HDP'ê Alî Urkut, parlementera berê Prof. Dr. Emîne Beyza Ustun, Hevseroka Giştî ya DBP'ê ya berê Sebahat Tûncel û parlementera berê Aysel Tûglûk.