WAN - Êrişên li ser Bakur û Rojhilatê Sûriyeyê û polîtîkaya tayînkirina qeyûman, li Wanê hate protestokirin. Parlamenterê DEM Partiyê Zulkuf Uçar axivî û got: "Rojava Wan e, Êlih e, Amed e. Sînorên we xêz kirin nikarin me ji xwişk-birayên me û ji xaka me qut bikin.” 

 

Êrişên li ser Bakur û Rojhilatê Sûriyeyê û polîtîkaya tayînkirina qeyûman, li Qada Kentê ya Wanê bi daxuyaniyekê hate protestokirin. Hevşaredarên Bajarê Mezin ên Wanê Neslîhan Şedal û Abdullah Zeydan û gelek kes tev li bûn. Di daxuyaniyê de gelek caran dirûşmên “Gelê kurd nerazê xwedî li Rojava derkeve”, “Bijî Serok Apo” û “Kurdistan dê ji faşîzmê re bibe goristan” hatin berzkirin. 

 

Parlamenterê DEM Pratiyê yê Wanê Zulkuf Uçar di daxuyaniyê de axivî. Zulkuf Uçar, tayînkirina qeyûm a li Şaredariya Miksê û biryara Dadgeha Bilind a têkildarî îadekirina mafên memnu yên Zeydan nirxand û wiha got: “Pêvajoyeke bêhiqûqiyê ya nû xistin meriyetê. Dema mafên memnu yên hevşaredarê me hatin îadekirin, li gorî hiqûqê tevgeriya bûn. Neslîhan Şedal û Abdullah Zeydan vîna gelê Wanê ne û hêza tu kesî têr nake vê rastiyê biguherîne. Tu zilm dê nekarin bi me paşvegavê bidin avêtin. Biryara Dadgeha Bilind li gorî fermanên siyasî hate dayin. Eleqeya wê bi hiqûq û demokrasiyê re nîne. Dema mesele dibe kurd, zilm û dijminatiya xwe nîşan didin. Dê kesek nekare bi zextan serî bi gelê kurd bide tewandin. Bi sedan sala ye kurd li dijî vê siyaseta we ya qirêjî li ber xwe dide.” 

  

Bi domdarî Zulkuf Uçar bal kişand ser êrişên ser Bakur û Rojhilatê Sûriyeyê û ev tişt anî ziman: “Rojava Wan e, Êlih e, Amed e, Miks e, Xelfetî ye. Sînorên çêkirî yên sed sal berê hatin xêzkirin nikarin me ji xwişk-birayên me qut bikin. Em van çeteyên îro êriş dikin baş nas dikin. Berdewamiya DAIŞ’ê ne. Ev çeteye HTŞ û SMO bûne yek û sûcan dikin. Bêguman xelkê Amed û Wanê dê li dijî êrişên ser gelê Rojava bêdeng nemînin. Em bang li îktîdarê dikin; gelo hûn ê bi van çeteyên komkujer re bin an bi Kurdên hûn jê re dibêjin ‘birayên me’ re bin? Gelê kurd li her devera Kurdistanê ji bo wekhevî û azadiyê têkoşiya. Her tim li dijî aqilê mêtinger li ber xwe da.” 

 

 Zulkuf Uçar, wiha dirêjî da axaftina xwe: “Armanc ew e ku birêz Abdullah Ocalan ê li Îmraliyê berxwedaneke mezin raber dike, di şert û mercên newekhev de neçarî muzakereyan bikin. Tevahiya gelê kurd û dostên wan di ferqa v ê de ne. Çawa ku li Îmraliyê ev 26 sal in berxwedaneke mezin tê raberkirin, çawa ku gelê kurd li dijî aqilê mêtinger ev sed sal in li ber xwe dide, dê îro jî dev ji vê berxwedana xwe bernede.”