MERKEZÊ XEBERAN - Torra Heqê Merdiman ê Kurdistanî neql kerd ke mamostayêke ziwanê kurdkî destbend kerda û tepişnaya.

 

Torra Heqê Merdiman ê Kurdistanî dîyar kerd ke mamostaya ziwanê kurdkî ya şarê Bokanê Sewsen Hesenzadeyî, badê ke venga semedê merkezê polîsanê Bokanî ameya kerdiş, destbend bîya û semedo ke cezaya ke ci rê ameya birnayîş (3 aşmî) bianca, berdîyaya zîndanê Urmîye.

 

Çimeyî neql kerd ke mamosta Sewsen Hesenzade 5 rojî destbend menda.

 

Goreyê çimeyî 8ê teşrîna verêne 2024ine de, dadgeha Keyferî ya Bokanî bi tometê ‘propagandaya hemverê hukmatî û endambîyayîşê komêke hemverş Îranî’ 3 aşmî ceza mamosta Sewsen Hesenzade rê dîyaya. Ame vatiş ke mamosta Sewsen bêavûkat ameya dadgehkerdiş.