WAN - Krîzê ekonomî yo ke pesûdewarkarî ardo sewîyeya çinbiyayîşî û polîtîkayê şerî ra tesîr penîrê bi vaşî yê Wanî zî kerd. Nergîs Tunçe dîyar kerde ke vaş esto la penîr çin o.

 

Seba polîtîkayê şerî yê hukmatî û krîzê ekonomî yê her ke şono pîl beno, pesûdewarkarî ameyo sewîyeya çinbîyayîşî. Dewa Kopanîs yê qezaya Îpekyolê Wanî cinîya bi nameyê Nergîs Tunçe dîyar kerde ke seba krîzê ekonomî wisarî ra dest bi rotişê heywanan kerdê û seba şit destê înan de nêmendo lazimîyê xo yê penîr û mast zî nêviraştê. Nergîse da zanayîş ke her serre înan aşme ra amadekarîyê zimistanî ameyne kerdiş û va wisar ra vaşê mend, siyabo, çunk, sîrmo, çatir, so û kurat kom kerdê la seba şit çin o nêeşkenê penîrê bi vaşî viraznê.

 

'Bîdonê 10 kîlo pirr nêbeno'

 

Nergîse reaksîyon vera krîzî da û va vaş esto penîr çin o û qiseykerdişê xo wina dewam kerde: "Wisar de seba krîzê ma heywanî rotî. Xeylê pesê mi bî. Çîyêke destê ma de nêmend zî rot. Xora wisar de şit zêde yo. Her serre mi xeylê penîr kerdêne binê herre. Ma do zimistanî bê penîr çi bikerê. Penîrê mi bi rojan kom kerdêne bîdonê 10 kîlo pirr nêkerdêne."

 

Nergîse tewr peyîn qiseykerdişê xo de ard ziwan ke seba krîzê ekonomî penîrê bi vaşî yê namdar yê Wanî nêviraştê, seba çinbîyayîşê şit, bê penîr mendê.