Derya Ren

 

RIHA - Hemsereka Egîtîm Senî ya Rihayî Ozlem Ulutaş Şengul da zanayîş ke MESEMo ke 4 rojê hewteyê pewerdeyê meslegî û rojêke zî perwerdeyê tedarîkî yeno dayîş de tutî sey hêzê erjan ê karî yenê şuxilnayîş û vat: “Uca de tutan rê heqeretê fîzîkî û vatişî zî yeno kerdiş.”

 

Tutî kategorîya karkerê tutan de yenê şuxilnayîş û reyan rayîr ver bi mergan abeno. Meaşê înan zî se ra 30ê meaşê asgarî yo. No zî binpêkerdişê kede xo dir ano. MESEMo ke mîlyonêk ra zêdeyêr wendekarê ey est ê, dem bi dem bi mergê tutanê karkeran zî yeno rojeve. Serra peyîne de Arda Tonbulo 14 serre, Alperen Enes Uralo 17 serre, Aleperen Kocayavuzo 15 serre, Zekaî Dîkîcîyo 16 serre, Ulaş Dumluyo 17 serre, Muratcan Eryilmazo 17 serre, Erol Can Yavuzo 15 serre, Omer Çakaro 17 serre qezayê karî de dinyaya xo bedelnayî.

 

Pêwa MESEMî Lîsteyê Meslegî û Teknîkî zî keda tutan yena binpaykerdiş. Hewte de hîrê rojî şuxilênê û di rojî zî perwerde vînenê. Hemsereka Sendîkayê Kedkarê Perwerdeyî û Zanistî (Egîtîm Sen) ya Rihayî Ozlem Ulutaş Şengul derheqê babete de qisey kerd.

 

‘Binê nameyê stajî de tutî yenê şuxilnayîş’

 

Ozleme da zanayîş ke binê nameyê MESEMî de bi sîstemê mekteban yeno kerdiş, rojêke perwerde seba tutan yeno dayîş û vat: “4 rojan binê nameyê ‘meslegî û bidestkerdişê meslegî’ de tutî kargehan de yenê şuxilnayîş. Lîseya meslegî de hîrê rojî staj, di rojî zî mektebî est ê. Nika MESEM de problemê pîlî yenê ciwîyayîş. Tutî hewte ra çar rojan şinê xebate û musayîşê meslegî ra wetayêr, karkerîya tutan uca de est a. Xeylêk rîskan hewêneno û asayîşê karî zî çin o. Tutî 14 serrîya xo temam bikerê, hewte ra çar rojan uca de şuxilênê. Binê nameyê stajî de tutî sey hêzê erjan ê karî yenê şuxilnayîş.”

 

‘Sermayeyî rê pere yeno neqlkerdiş’

 

Ozleme peynî de vat, MESEM û Lîseya Meslegî, barê kontrolkerdişî dayê mamosteyan û wina vat:  “Kargerî û mamoste yenê rî bi rî. Tutê ke yenê şuxilnayîş, meaşê înan dewlete dana. Nê dir zî fonê betalî sermaye rê pere yeno dayîş. Tutî zî sey hêzê erjan ê karî yenê şuxilnayîş.”