ENQERE- Endama SGDFyî Gîzem Altinoze dîyar kerde ke do sey Buşra, Polen û Eceyan xover bidî û va: “No pêvînayîş pêvînayîşê domananê Gêzî û Kobanî hedef kerdêne. Waştî ke xeyalanê ma çin bikerî. Embazê ma yê ke Pirsûsî de ameyî qetilkerdiş şopdarê Roboskî û cinîyan bî”

 

Heme cayanê Tirkîya ra 330 endamê Fedarasyonê Komeleya Ciwananê Sosyalîstan (SGDF), seba domananê Kobanî, paştî bidê Kobanêyijan, gedeyan rê materyalanê kayê berê, yew parqê gedeyan virazê, yew kitabxane (pirtûkxane) saz bikê û fîdeyanê daristanê ronê şîyî Pirsûsî û bexçeyê Merkezê Kulturî yê Amara de îzehet dayî. Wextê wendişê îzehetî de bombeyê ganî xo teqêna û netîceyê teqayîşî de 33 ciwanê SGDFyî cuya xo vînî kerdî. Qetlîamê Pirsûsî 20ê Temmuza 2014î de qewimîya û emser Serrgêra 4. ya Qetlîyamê Pirsûsî ya. Bîyayîşê Qetlîamê Pirsûsî ra nata seba hesabperskerdişî têkoşîn nêvindert, la herinda vînayîşê qatilan ciwanê SGDFyî ameyî muhakemekerdiş.

  

Babete ser o Endama Fedarasyonê Komeleya Ciwananê Sosyalîstan (SGDF) Gîzem Altinoze qisey kerde û dîyar kerde ke do sey Buşra, Polen û Eceyan xover bidî.

 

'Kobanî seba înan cîya bî'

 

Gîzem Altinoze destpêkê qiseykerdişê xo de dîyar kerde ke kampanyaya ‘Ma pîya xo pawit û ma do pîya bicuyî’ ke 3 serrî verê cu dabî destpêkerdiş xeylê ciwananê sosyalîstan rê bîya omid û wina dewam kerde: “Cografyaya ke ma tede cuyenî Kurdistan nêba zî Kobanî zaf cîyaya. Ewca de şoriş estbî. 33 embazê ma seba ke dest bidî şorişî şîyî ewca. Hedefê ciwanan resnayîşê materyalanê kayê bî û waştêne ke materyalanê kayê bidî domananê Kobanî. Ciwanî waştêne ke rasteyê cuye newe ra awan bikerî. Ciwanê busûcî bexçeyê Amara de hetê çeteyanê DAIŞî û ortaxê înan ra ameyî qetilkerdiş.”

 

'Destûr nêdayî dest bidî şorişî'

 

Gîzeme dewamê qiseykerdişê xo de va ‘Qezaya Pirsûsî de tena ciwanê SGDFyî nêameyî hedefgirewtiş’ û wina domnaye: “Qetlîamê winasî de sosyalîzm yeno hedefgirewtiş. Kampanyaya pêvînayîşê domananê Kobanî û Gezî hedef girewtî. Sebebê qetlîamî bêtehammulî bî. Cok ra vernîya ma girewtî.”

 

'Ma fek talebê edaletî ra vera nêdanî'

 

Gîzeme qiseykerdişê xo de înan arde ziwan ser û va: “Pirsûs bî destpêkê qetlîaman û 10ê Teşrîna Verêne de kesê ke seba aştî arê bîyî ra 103 kesî ameyî qetilkerdiş. 3 serrî yo ke ma waştişê edaletî ra fek vera nêdayo. Doza Pirsûsî de 18 aşmî qerarê nimite esrtbî. Keyeyî 18 aşman paweyê wedarnayîşê qerarê nimite vimdetî. Dima ra mehkema berdî Hîlwanî. Amirê mudirîyeta polîsan doze ra 7 hezar û 500 TL ceza girewt. Bedelê 33 ciwanan cezaya pere bî.”

 

'Ma do reyna şêrî Pirsûsî'

 

Gîzeme qiseykerdişê xo yê peyênan wina va: “Avûkatê ke doze şopnayî zî ameyî hedefgirewtiş. Ciwanê sosyalîstî ameyî tewqîfkerdiş û rastê tehdîtan ameyî. Têkoşînê ma yê edaletî 3 serrî yo ke dewam keno. Ma do emserr reyna Pirsûsî de bî. Ma embazanê xo yê ke şehîd bîyî ra vanî ‘Rayvanê Xeyalan.’ Waştî ke xeyalanê ma çin bikerî. Xeylê kesî kurd bî. Hewl danî ke dest bidî şorişî. Embazê ma yê ke Pirsûsî de ameyî qetilkerdiş şopdarê Roboskî û cinîyan bî.”