Dîlber Mihemed

 

SERÊKANIYÊ - Fatma Ebdulrehman EL-Alî ya ke karê deştişî kena û debara xo kena, yew cinîyê ke hukmê vernîyê komelî rijnena ya. Fatma veng da heme cinîyan ke ê zî têkoşîn bikerê û serê linganê xo de vinderê û nêverdê ke tu çîyêke vera waştişê cuya înan vinderê.

 

Fatma Ebdulrehman EL-alî (31) ya ke karê deştişî kena û debara xo kena yew cinîyê ke hukmê vernîyê komelî rijna ya. Fatma bi deştişê cil û belgan debara keyeyê xo kena. Fatma maya 5 domanan a hîrê kêna û di lajê xo bi keda destê xo pîl kerda.

 

Dimayê ke zewicyaya zî karê deştişî kerda

 

Fatmaya ke bi keda destê xo debara xo û domananê xo kena derheqê keda xo de wina va: "Ez karê deştişî cinîyêke pispor ra musaya. Bi dorê des serran o ke ez nê karî kena. Ez zewicyaya û bîya maya 5 domanan la mi reyna zî fek karê xo ra vera nêda. Ez bi no karî debara keyeyê xo kena. Hetêke ez bi hezkerdiş karê deştişî kena. La reyna ez vînena ke ganî cinî hetê ekonomî de xo aver berê, seba ke cinî bingehê komelî yê."

 

'Ez kede dana û keda xo wayîr vejîyena'

 

Fatma dîyar kerde ke heta peyîn aye do keda xo wayîr vejîyo û wina dewam kerde: "Waştişê mi kerdişê no karî o yo ke xizmetê miletê xo bikerî û seba averşîyayîşê komelî gerek her wext cinî zî xo aver berê û eke merdim biwazo ke çîyêk bipawo ganî keda xo rê wayîr vejîyo û dewam bikero."

 

'Ganî cinî milê xo vera kesî war nêkera'

 

Fatmaye bale ante serê keda cinîyan mîyanê komelî de û qiseykerdişê xo wina qedêna: "Cinî wayîrê hêz û îradeyêke pîl ê, no semed ra cinî cayêke zaf pîl mîyanê komelî de ca gênê. Cinî her wext ganî bi keda destê xo wayîrê xo û keda xo vejîyê û milê xo vera tu kesî nêkerê war. Çunke bi keda destê xo cinî komelî rê wayîr vejîyenê."