MÊRDÎN - Rozerîn Kalkana ke bi "Endama Rêxistine ra" 9 serrî bi sebebê "Propangandayê Rêxistine" zî serrêke û hîrê aşme ceza ci amî birnayîş, maya aye Şerîfe Kalkane cezaya ke ameya birnayîş şermezar kerde û va cezaya ke Rozerîne rê ameya birnayîş bêhiqûqî ya. Şerîfe, dîyar kerde ke cezaya Rozerîne rê ameya birnayîş heme keyeyê aye rê ameya birnayîş.

 

Rozerîn Kalkana 11ê Tebaxa 2016 de netîceyê eştişê keyeyî aye ser amî tepiştiş û 9 rojî Emnîyetê Mêrdînî Şubeyê Têkoşînê bi Terorî de mende û bi îşkenceyê fîzîkî û zayendî dir rî bi rî mende. 3ê Temmuze de roniştişê qerarê dewaya Rozerîne 2yîn Dadgeha Cezaya Giran ya Mêrdînî de amî vînayîş. Rozerîne Hepisxaneyê Şakranî de bi rayîrê SEGBISî beşdarê roniştişî bîbî û bi sebebê "Endama Rêxistine" 9 serre û bi sebebê "Propangandayê Rêxistine" zî serrêke û hîrê aşmî ceza ro ci amî birnayîş. Derheqê babete de maya Rozerîne, Şerîfe Kalkane qisey kerde.

 

Şerîfe arde ziwan ke Rozerîne wendekar bîya, cezaya ke ro ci ameya birnayîş qebûl nêkena û wina va: "Seba çi cezayêke wina pîl Rozerîne rê birnayî, aye wendekar bî. Ganî cezayêke wina berz aye rê nêameyne birnayîş. Tu sucê Rozerîne çin o, rojêk ameyî keye bê sûc girewtî û berdî. Ewro na cezaya ke Rozerîne rê ameya birnayîş tena aye rê nê ma rê zî ameya birnayîş. Ma na ceza qetî qebûl nêkenê”

 

'Ma na ceza heq nêkerda'

 

Şerîfe, dewamê qiseykerdişê xo de dîyar kerde ke Rozerîne 11 aşman Hepisxaneyê Nîgde de hucre de ameya tepiştiş û da zanayîş ke dimayê 11 aşman Rozerîne sewqê Îzmîrî kerdê û wina va: "Weşîya Rozerîne baş nîya. Nêeşkena qeleme bigîra destê xo û nuştiş binusna. Rewşa kêna mi her ke şina xirab bena û aye nêbenê nêweşxane. Eynî wextî koxuşa ke kêna mi tede ya mîyan de 6 cinîyê ke nêweşê rîşa merdimwere yê zî estê û rewşa înan baş nîya. Seba weşîye ê cinîyan zî çîyo lazim bêro kerdene. Cezaya ke Rozerîne rê amî birnayîş zî bandurêke pîl ro ma kerd. Seba ke kêna mi amî tepiştiş, mêrdeyê mi zî kar ra ame eştiş. Dewlete bi her tewir rayîr vernîya ma de gieewta. Eynî wextî de ma her aşme nêeşkenê şorê pêvînayîşê kêna xo zî. Lazimî bi pêvînayîşê kêna ma esta. La ma her gam nêeşkenê şorê pêvînayîşê aye. Ma wazenê na ceza bêra xirakerdiş. Ne ma ne zî kêna ma, na ceza heq nêkerda."

 

'Ez do îtîraz bikera'

 

Şerîfe, tewr peyîn qiseykerdişê xo de va ke vera cezaya Rozerîne rê ameya birnayîş do bêveng nêmana û qiseykerdişê xo wina qedêna: "Ez do îtîrazê na ceza bikerî. Na ceza nîna qebûlkerdiş. Seba ke ma kurd ê na ceza ro ma amî birnayîş. AKP 16 serre yo serê îktîdarî de yo û bi 16 serre yo, ro ma rê zulm keno. Ma do vera no zulmî qetî sere nêtewênê. Ganî heme şarê Kurdî vera nê cezayê bêhuqûqî ke yenê birnayîş wirzê serê lingan."