AMED - Xebatê rayîrî ke bi serrêke yo Kuçeyê Gazî yê Sûrî dewam keno, hemwelatîyan acis kerd û merdimî nêeşkenê rayîr de bimeşê. Esnafan dîyar kerd ke bi xebatê rayîrê ke peynî nêbenê, yeno amanckerdiş ke şarê Sûrî bi ekonomî ceza bikerê.

 

Hetê qayûm ra xeylê qezayê Amedî xebatê rayîrê meşnenê û yew nê cayan ra Kuçeyê Gazî yê Sûrê Amedî yo. Şarî dîyar kerd ke xebatê ci bi hawayêke temam nêbenê û vatî ê seba herre nêeşkenê bimeşê û ê acis bîyê. Esnafê Sûrî zî reaksîyon mojnayî rewşe û vatî wazenê şarê Sûrî bi ekonomî ceza bikerê. Cinîya bi nameyê Arya Çelîke zî va nêzanê xebatê rayîrî do heta key dewam bikerê.

 

Aryaye va aye serrêke verê bi xeylê embazanê xo dir şaredarî ra ameyê îxrackerdiş û têkoşînê xo yê zor û zehmet wina va: "Dimayê ke ez ameya îxrackerdiş mi kar nêdî. Mi va ez bêçare nîya û ez do her çî bikerî. Mi wextê xo vindî nêkerd û mi dikanêke akerd."

 

'Esnafîyê Sûrî zaf cîya yê'

 

Aryaye arde ziwan ke damêke verê Sûr de şerêke ameyo ciwîyayîş û nê dir zî xeylê kesî cuya xo dayê û wina va: "Sûr seba mi zaf cîya yo. No semed ra mi uca dikan akerd. Seba şerî merdiman koç kerd. La xeylê kesî keyeyê xo terk nêkerdî. Bi şer nêqedênê nika wazenê bi ekonomî pirodê. Wazenê ekonomîya înan qels bikerê.”

 

'Polîtîkayê dewlete dewam kenê'

 

Aryaye tewr peyîn qiseykerdişê xo de va roja ke dikan akerda heta nika xebatê rayîrî estê û va bi nê xebatan yeno amanckerdiş ke Sûr bê ekonomî verdê û şarî winî ceza bikerê.  

 

Aryaye da zanayîş ke viraştişê rayîrî mexduriyetêke pîl awan kerdo û bi serrêke na rewşe dewam kena.