Berçem Cûdî

 

MINBIC - Endamê Îdareyê Meclîsê Cinîyan ê bajarê Minbicî derheqê bandura 19ê Temmuze 2011 de Şorişê Rojawanî yê serê têkoşînê xelisnayîşê Minbicî de vatî: "Şorişê Rojawanê Kurdistanî hêviyê ma yê têkoşînê xelisnayîşê Minbicî gur kerd."

 

Endamê Îdareyê Meclîsê Cinîyan ê bajarê Minbicî derheqê bandura 19ê Temmuze 2011an Şorişê Rojawanê yê serê têkoşînê xelisnayîşê Minbicî de ardî ziwan ke cinîyê Kurdan rayberîya şorişî kerdê.

 

'Ma zî şoriş ra bandure bî'

 

Endamê Îdareyê Meclîsê Cinîyan yê Bajarê Minbicî Neciya Hecî ke bi eslê xo  Çerkez a da zanayîş ke Şorişê Rojawanî her cayê Sûriye de pêl bi pêl vila bi û bandurêke pozîtîf ser hemleyê xelisnayîşê Minbicî zî kerd û va: "Cinîyê Rojawanê Kurdistanî bi çîkê Şorişê Rojawanî têkoşînê xo tewr pîl kerdî û seba azadiya heme cinîyan xo ver dayî. Ma zî no şorişî ra bi bandure bî. Ma zî sey cinîyê Çerkez nêeşkayne verê Şorişê Rojawanî ziwanê xo bi hawayêke azad qisey bikerê. La xêrê têkoşînê cinîyê Kurdan, cinîyê Çerkezî zî nasnameyê xo vera teda ra pawitî."

 

'Şorişê Rojawanî wisarî cinîyê Rojhelato Mîyanên o'

 

Endama Îdareyê Meclîsê Cinîyan yê Bajarî Minbicî Nadiye Milhima ke eslê xo Tirkmen a da zanayîş ke Şorişê Rojawanî wisarê cinîyê Rojhelato Mîyanên o û wina va: "Hemleyê Şorişê Rojawanî bandurêke pozîtîf serê heme Sûriye kerd. Cinîya Kurd zî rayberîya nê çî kerde û heme cinîyê Rojhelato Mîyanên rê bi feyz. Ma zî sey cinîyê Tirkmenan feyz no têkoşînî ra girewt."

 

'19ê Temmuze hêvîya têkoşînê xelisnayîşê Minbicî gur kerd'

 

Endama Îdareyê Meclîsê Cinîyan yê Bajarê Minbicî Meha Elî zî dîyar kerde ke hêviyê înan yê cinîyê Erebî bi Şorişê Rojawanî tewr gur kerd û wina va: "19ê Temmuze hêvîya têkoşînê xelisnayîşê Minbicî weş kerd. 19ê Temmuze roja newebîyayîşê azadîya cinîyan o. Xêrê nê şorişê sey cinîyê Ereb ma zî xeylê heqê xo kerd dest. Cuya ma de vurnayîşê zaf baş ca ardî. Bi Şorişê Rojawanî cinîyê Erebî nika warê sîyasî, komelî û sewbînî cayê xo gênê. Ma do zî têkoşînê xo tewr pîl bikerê û vera zihnîyetê yewperest şer bikerê."