Habîbe Eren

 

ENQERE - Komeleya Heqê Merdiman ya (ÎHD) Anqara bi hedefê vernîgirewtişê îstismarbîyayîşê domanan û averberdişê domanan atolyeyêk ‘Cesaret bidêne domanan û bêveng nêmane’ daye dest pêkerdiş. Endama ÎHDyî Sevînç Koçake dîyar kerde ke çarçeweya atolyeye de do domanî bêrî perwerdekerdiş û derheqê tedbîr girewtişan de do zanayîş bidîyo keyeyan.

 

Rojanê peyênan de vera îstîsmarbîyayîşê domanan de reaksîyonî zêde benî. Bîyayîşê hukmatê AKPyî ra nata hûmara îstîsmarbîyayîşê domanan se ra 700 zêde bîya û seba vernîgirewtişê îstîsmarbîyayîşê domanan çîyêk nîno kerdiş. Polîtîkayê şaşî komelî de netîceyê danî teber û benê sebebê rijnayîşê ehlaqê komelî. 

 

Komeleya Heqê Merdiman ya (ÎHD) Anqara seba astengkerdişê îstîsmaran, roşnkerdişê keyeyê domanan û averberdişê domanan atolyeyêk ‘Cesaret bidêne domanan û bêveng nêmane’ daye dest pêkerdiş. Endama ÎHDyî Sevînç Koçake dîyar kerde ke çarçeweya atolyeye de do domanî bêrî perwerdekerdiş û derheqê tedbîr girewtişan de do zanayîş bidîyo keyeyan.

 

Sevînçe derheqê atolyeye de malumatê muhîman daye û qiseykerdişê xo de wina va: “Esasê hêrişanê cinsî de polîtîka estî. Hêrişkar cesaret û hêzê xo polîtîkayê dewlete ra herînenî. Polîtîkayî herinda ke domanan bipawî zirar danî domanan. Sehnayîş û daliqnayîş kewtî rojeve û yenî munaqeşekerdiş. Heta ke polîtîkayî nêrî raştkerdiş, problemî nînê çareserkerdiş. Ganî sîstemo ke beno sebebê sûcan bêro çinkerdiş."

 

‘Kulturê şîdetî yeno vilakerdiş’

 

Sevînçe qiseykerdişê xo yê peyênan de wina va: “Bi daliqnayîşan wazenê kulturê şîdetî vila bikerî û muxalefetê ke reaksîyon binawnî bêrî pelçiqnayîş. Qatilî qanûnê ke sûcdaran pawenê ra cesaret herînenî. Daliqnayîş çareserî nîyo.”