XARPÊT- Hepsîya nêweşe Meles Tekîna ke cezaya aye ameya tesdîqkerdişe, seba ke bêra tehlîyekerdiş di aşmî paweyê raporê Dezgeyê Tibê Edlî (ATK) yê Edeneyî mende. Ame zanayîş ke Meles Tekîna ke rewşa aye giran bena do koguşî de girêdayeyê diyalîzî biba.

 

Meles Tekîna 73 serrî Mêrdînî de bi mehneya 4 serr û 2 aşmî cezaya aye ameya tesdîqkerdişe aşma nîsane de amey tewqîfkerdiş û dima ra surgunê Zindanê Xarpêtî amey kerdiş. Meles Tekîne problemê weşî cuyena û seba raporê Dezgeyê Tibê Edlî (ATK) sewqê Edeneyî amey kerdiş. Raporê ATKyî yê Edeneyî de do tehlîyebîyayîşê Tekîne bêro dîyarkerdiş. Tekîne 2 aşmîya ke paweyê raporê ATKyî ya. keye û avûkatê Tekîne îdareya zindanî gêrayî û cewabê ‘Eke şima netîce merak kenî, ganî şima bêrî tîya’ dîya înan.

 

Do girêdayeyê diyalîzî biba

 

Tekîne de nêweşîyê zerr, sîne, tansîyon û şekirî estî, berzbîyayîşê tansîyonî vera hertim rewşa aye hîna xirab bena. Keyeyê Meles Tekîne dîyar kerd ke hema hema her roje aye bênî rewîr û bi piştîya embazan cuya xo domnena. Leşe Tekîne maseyeya û ame zanayîş ke gurçike xo vera do koguşî de girêdayeyê diyalîzî biba. 

 

Seba serbestveradayîşê Tekîne muracatê Zindanê Mêrdînî û Xarpêtî ameyî kerdiş, la bi mehneya raporî ra cewab nêameyo, muracatî ameyî redkerdiş.