MÊRDÎN - Êzidîyê ke bi zor kampa Amedî ra ameyî vetiş û kampa AFADî yê Mîdyadî de ameyî bicakerdiş, seba probleman koçê Ewropa kenê û bi di serre yo zî nêverdenê parlamenterê HDPyî şêrê kampe.

 

DAÎŞî 3ê Tebaxa 2014 de hêrişê qirkerdişî Şengal de kerdî û no semed ra bi hezaran Êzidî mecbur mendî koç bikerê. Bi hezaran Êzidî warê Fîdanî yê Yenîşehîrî Amedî de bi ca bî. La dimayê ke qayûm tayînê şaredarîya Yenîşehîrî bi dima Êzidiyê uca aşma Çele de kampe ra ameyî vetiş û berdî kampa AFADî ya Mîdyatê Mêrdînî. Êzidî uca de rastê vatişê nefretî yê xebatkar û rayedarê kampe ameyî, dîyar kerdî ke hewte de di rey eşkenê vejîyê teber û problemê derman û doktorî yenê cuyayîş.

 

'Şima meyman ê tu heqê şima çin o'

 

Êzidiyê Kampa AFADî rastê tehdîdê sey 'Kam şima ra tebera persan pers bikero, şima do çîyêk nêvajê' ameyê. Êzidîyê hamnanî çadirê ke klîmayê înan xirabîyayîş de cuyenê zimistanî zî kêmasîyê sobeyan cuyenê. Warê ke domanî tede kay bikerê zî çin yo. Ame vatiş ke werdê ke yenê vilakerdiş zî qîm nêkenê û problemê weşî yenê cuyayîş û ame musayîş ke revîrî înan ra vato 'Şima meyman ê tu heqê şima çin o'.

 

Feleknas Uca: Bi di serre yo ke ma nêgînê zere

 

Bi seyan Êzidî seba îmkanê nêbaş koç kerdî û 500 Êzidiyê ke mendê do koç bikerê. Bi di serre yo parlamenterê HDPyî hewl danê şêrê kampan la destûr seba şîyayîşê înan nêame dayîş. Rojê vîyarte de parlamentera HDPî ya Êlihî Feleknas Uca waşte ke şêro kampe la selahîyetdarê kampe vatî ganî qeymeqamî ra destûr bêro girewtiş. Feleknase qeymeqamî geyra û qeymeqam zî va gerek wezaretê karê zerî ra destûr bêro girewtiş. Feleknase da zanayîş ke di serre yo destûr nîno dayîş û va: “Gelo ma ra çi nimnenê ya zî nêwazenê ma çi bivînê ma nêgînê zere."

 

Kampe de seba domanê Êzidî perwerdeyê Tirkî yeno dayîş û heto bîn ra kampe de zî marketê BÎMî ameyo akerdiş.