STENBOL - Endama Weqfê 78an Şengul Yuksela ke aşma hezîrane de hepisxaneyê cinîyan ê Bakirkoyî ra amî tahlîyekerdiş, bale ante serê îhlalkerdişê heqan yê dimayê îzahatê serekê pêroyî yê MHPî Dewlet Bahçelî sey 'Hepisxaneyan de xo seba serewedartişî amade kenê'. Şengule da zanayîş ke mudirê hepisxaneyî zî tehdîdê ‘ma do nê cayan ro şima teng bikerê' kerdo.

 

Endama Weqfê 78an Şengul Yuksela ke aşma Hezîrane de hepisxaneyê cinîyan ê Bakirkoyî ra amî tahlîyekerdiş, bale ante serê îhlalkerdişê heqan yê hepisxaneyan. Şengule da zanayîş ke bi OHALî dir îhlalkerdişê heqan yê hepisxaneyan zêde bîyê û nê zêdebîyayîş zî bi îzahatê serekê pêroyî yê MHPî Devlet Bahçelî rê girê da.

 

'Dimayê îzahatî hêriş zêde bî'

 

Şengule bale ante serê îzahatê Devlet Bahçelî yê sey 'Hepisxaneyan de seba serewedartişî xo amade kenê' û wina dewam kerde: "Dimayê nê îzahatî hêrişê hepisxaneyan zêde bî. Solê embazê cinîyan verê camêrdan de vetî û cigêrayîş kerdî. Ma rastê caardişê vera demokratîkî ameyî. Çîyêk hepisxaneyan de virazyo berpirsîyar Devlet Bahçelî yo. Tu şansê pawitişê yê hepisxaneyan çin o. Rewşa ke hedîse vejê çin o. Çîyêk zere de virazyo o zî hetê kesê Bahçelî dir eşkenê bi ca bîyarê."

 

Şengule arde ziwan ke mudirê hepisxaneyî zî ê tehdîd kerdê û va “Ame koxuşê ma û va ‘Ganê şima destê ma de yo. Ma do nê cayan şima rê teng bikerê."

 

'Nêweşxane de destê ma kelepçekerde bi'

 

Şengule bale ante serê problemê nêweşî yê hepsîyan zî û va wexto ke hepsîyan benê nêweşxane destê înan çep kelepçe kenê û hepsîyê sîyasî û edlî eynî rîngî de benê. Şengule da zanayîş ke sebebê ci zî o yo ke hepsîyê sîyasî bikerê hedefê hepsîyê edlî û her rey problemêke vejîno.

 

Heto bîn ra Şengule dîyar kerde ke bi mehnaya 'halo îstîsnayî esto' heme waştişê hepsîyan yenê redkerdiş û qedexeyê name û kitaban zî dewam kenê. Tewr peyîn Şengule îhlalkerdişê heqan û îzahatê Devlet Bahçelî tekrar kerde û vengdayîşê piştdayîşê raya pêroyî kerde.