STENBOL - Cinîyî seba ke bale biancî îstismaro zayendî yê serê domanan û cinîyan ser kişta Operaya Sureyya ya Kadikoyî de çalakî viraştî û dîyar kerdî ke îdam çareserî nîyo.

 

Partîya Demokratîke ya Şaran (HDP), Komeleya Cigêrayîş û Kulturî ya Anadolî (AKA-DER), Partîya Şorişgeran, Partîya Kede (EMEP), Keyeyê Şar, Partîya Awankerdişê Newe ya Sosyalîstan (SYKP) û Partîya Karkeran ya Tirkîya (TIP) bi siloganê ‘Mevindere biqîr’ reaksîyon nîşan dayî îstismarbîyayîşê doman û cinîyan. 

 

Çalakgerî kişta Operaya Sureyya ya Kadikoyî de çalakî viraştî û dîyar kerdî ke ganî kesê ke domanan îstismar kenî ra hesab bêro perskerdiş. Çalakgeran ra Sedef Akçaye îzehet daye çapemenî û daye zanayîş ke ê do qatilê doman û cinîyan ra hesab bipersî. 

 

'Ganî têkoşîn bêro dayiş'

 

Sedefe qiseykerdişê xo de wina va: “Ganî kesê ke îstismarbîyayîşê doman û cinîyan meşru kenî ra hesab bêro perskerdiş. Ganî mekanîzmaya taqîpkerdişê îstismaro zayendî bêro awankerdiş û heme kesî seba heqê cinî û domanan seferber bibî. Îdam çareserî nîyo. Vera îstismaro zayendî de têkoşînê edaletî xeylê muhîm o. Ganî edalet cezaya îstismarî kêmî nêkero. Ganî heme kesî bibî yew û vera îstismarî de têkoşîn bidî.”