RIHA - Yewin rojnamegera cinîyan ê Riha xebityena Arjîn Dîlek Oncele dîyar kerde ke rojnamgerî meslekêke zehmet o û wexto ke nasnameyê cinîyan ro ci zêde beno tewr zehmet beno. Arjîna ke war de wext bi wext rastê vatişê zayendperest û tehdîdan yena, dîyar kerde ke aye kuçeyan de hêzê cinîyan geyrena.

 

Rojnamegera Ajansê Mezopotamya Arjîn Dîlek Oncele Riha de xebate meşnena û bi hîrê serrî yo yewin cinîya war de rojnamegerî kena ya. Arjîne zor û zehmetîyê rojnamegerî qalî kerde Arjîne da zanayîş ke rojnamegerî meslekêke zehmet o û wextê nasnameyê cinîyan ro ci zêde beno no tewr zehmet beno û Tirkîya de karê rojnamegerî cesaret wazeno.

 

Arjîne da zanayîş ke bi hîrê serrî yo Riha de rojnamegerî kena û wina va: "Ma wexto ke şinê xeberan sey ma şinê şer ma keye ra vejîyenê. Ma layê lastîkanê xo wişk girê danê. Ma porê xo girê danê. Ma nêzanê kuçe de çi bendeyê ma yo. Îqtîdarêke ma ra rehet nîyo esto. Merdim hema eşkenê bêrê tepiştiş û tewqîfkerdiş." Arjîne eynî wextî de bale ante ser tedayê serê rojnamegeran û va her wext rojnamegerî yenê tepiştiş û tewqîfkerdiş û bi taybetî zî îqtîdar cinîyan ra terseno. 

 

‘Ma war de zehmetîyan ancenê'

 

Arjîne wina dewam kerde: "Seba OHALî hûmara xeberê rutîn zaf kêm bîyê. Ma war de rastê zehmetîyan yenê. Wexto ke mi newe dest bi rojnamegerî kerde derûverêke tewr baş estbi. La seba rojnamegerê Kurdan derûver qet nêvurya. Seba rojnamegerê nêzdîyê îqtîdarî derûverêke baş esto. Ma şîne îzahatan heme rojnamegerî uca bî. Yewin cinî ez bîya. 20 camêrd estbî, ez zî tena bîya. Înan wina fikryayne; cinî nêeşkenê kamera bigîrê, fotografan biancê û persan pers bikerê. Mi hîsê înan hîs kerdêne."

 

Tecrubeyê yewin

 

Arjîne roja destpêkê meslekê xo zî qalî kerde û va: “Îzahatêke estbi. Mi kamera girewt û ez şîya uca. 10 rojnamegerê camêrd estbî. Ez pey hemine de vindertbîya. Mi hewl dayne xo bikerî mabêne la bejna înan derg bî. Ez peynî de bîya. La mi xo bi hawayêke derbazî vernî kerd. Avûkata ke îzahat dayne piştdayîş da mi. Vatî heta tu ca nêgîrê ma dest pê nakin Ev gelek li xweşa min çû.”

 

‘Hewl danê cinîyan heps bikerê’

 

Arjîne dewam de qiseykerdişê xo de arde ziwan ke rojnamegerê cinî ferz kenê ke pey berê girewte xebatan bimeşnê û înan mecbur kenê ke zere de bixebityê. Arjîne arde ziwan ke rojnemgerê camêrd mabêne xo de ziwanê serdest xebitnenê û hîn rojnemeger zî vatişê zayendperest xebitnênê. 

 

Arjîne dîyar kerde ke aye sey rojnamegerê yê Kurdî hem nasnameyê canîyan pawenê û hem zî têkoşînê vera serdestîyê camêrd danê û warê reng û cesaretê cinîyan ra hêz gênê. 

 

Arjîne tewr peyîn qiseykerdişê xo de wina va: "Mintiqa de bêdadiyek pîl esta. Hîn çîyê ke rayîr de nêşinê estê. Qetilkerdişê Esvet Şenyaşarî verê çimê mi ra derbaz nêbeno. Ma dî o senîn ame qetilkerdiş. Verê çimê wezîrê ramitişî Fakibaba ame lînçkerdiş. Verê çimê înan de hemwelatîyêke ame qetilkerdiş. Camêrdêke bi vengo berz vengdayîş kerdêne. Dima ra ez musaya ke birazayê Îbrahîm Halîl Yildizî yo. Bi vengêke berz vatêne ‘Ez do to bikşî'. Eke ma bêvengî nêvejîyayne ma do biameyne lînçkerdiş. Yanî înan do xesp bikerdêne. Uca de 3 kesî birîndar bî. La yew kes nêame tepişkerdiş."