AMED - Sereka Komeleya Pawitişê Heywanan û Xozaya Amedî Sevgî Ekmekçîoglu dîyar kerde ke îstîsmarê vera domanan ganî îşkenceyê vera heywanan cîya nêro fikirnayîş û va ganî her di babetan de zî sererastkerdişê qanûnî bêrê kerdiş û xebatê perwerdê bêrê zêdekerdiş.

 

Tirkîya û Kurdistan de îstîsmarê vera doman û îşkenceyê heywanan roj bi roj tewr zêde benê. Sereka Komeleya Pawitişê Heywanan û Xozaya Amedî (HAYTAP)  Sevgî Ekmekçîoglu hem îstîsmaro zayendî û hem zî îşkenceyê vera heywanan JIN NEWSî rê qalî kerde.

 

Sevgî bale ante serê îşkenceyê vera heywanan yê wextê peyîn û sebebê ci qalî kerde: "Tirkîya de kulturêke nefret û şîdetî zêde beno esto. Heywanî komel de bêpawitox ê. No semed ra şîdetî dir rî bi rî yenê. Qanûnê ke heywanan pawenê çin ê û cezayê giran çin ê."

 

‘Sûc û sûcdar yenê normalkerdiş'

 

Sevgî dewam de da zanayîş ke îşkenceyê vera heywanan ganî sey suc bêrê destgirewtiş û cezakerdiş û wina va: "Ganî îstîsmaro zayendî yê vera domanan, îşkenceyê vera heywanan cîya nêro vînayîş. Enqere de 22ê Hezîrane de Eylul Yaglikara ya 8 serrî rastê îstîsmarê camêrdêke amî û dima ra amî qetilkerdiş. O camêrd î verê zî îşkenceyo zayendî heywanan kerdo. Wexto ke hedîseyê îstîsmarî yenê cigêrayîş, kesê îstîsmaro zayendî domanan rê kerdê, verê zî bi hedîseyê îşkence û tecawizê yê heywanan ameyê rojeve. No semed ra zî îstîsmarê vera domanan û îşkenceyê hemver heywanan yewbînan dir cîya nînê girewtiş. Vernîgirewtişê zîhnîyetê îşkenceyê heywanan keno do seba vernîgirewtişê îstîsmarê domanan zî bibo hetkar."

 

Sevgî da zanayîş ke hedîseyê wina serê merdiman dr ters û endîşe awan keno û va ganî na babete de her kes bibo pawitoxê heq û xebatan bimeşnê û eynî wextî de babeta heqê merdim û heywanan de perwerde şert o.