ŞIRNEX - Ayşe Kabula wextê qedexeyê tebervejîyayîşê kuçeyan de semedo ke keyeyê aye xira bibi û derbazê keyeyê kîra bîbî, la reyke bîn zî do keyeyê aye xira bibo û raya hîrên cayê xo ra biba. Keyeyê Ayşeya 60 serrî serrê 1990 de seba polîtîkayê koçberî 2 rey amebi veşnayîş. La Ayşeye bi qerar a û vana "Ez serê herra xo ra nêşina tu cayêke."

 

Serrê 1990an de bi polîtîkayê koçberî mîyanê bajarê ke tewr  zêde bi bandor bi yew ci ra Şirnex o. Dimayê qedexeyê tebervejîyayîşê kuçeyan de Şirnex reyna bi rijnayîşê dir rî bi rî mend û 8 kuçeyê ci ameyî rijnayîş û vera ci TOKÎ ameyî awankerdiş. Bajaro ke her ca û kuçeyê ey de hîkayeyê Kurdistanî qewimyayê, Ayşe Kabula 60 serrî 3 rey do cayê xo ra biba.

 

Ayşeye vera TOKÎyan keyeyêke do bêro rijnayîş de manena. Ayşeya ke keyeyê kîra de manena do reya 3in biba şahidê rijnayîşê keyeyê xo.

 

Serra 1990an de mecbur mende ke Feraşîn ra vejîya

 

Ayşeya ke serrê 90an de mecbûr mende ke dewa Feraşîn ra vejîya wina qalê hîkayeya xo kerde: "Ma Feraşîn de dewêke de mendêne. Keyeyê ma û heywanê ma estbî. Ma amadekarîya zimistanî zî kerdebî. Dima ra şewêke de şima do dewe ra vejîyê. Ma zî mecbur mendî ke çîyêke xo nêgîrê û dewe ra vejîyê. Dimayê ke ma vejîyayî keyeyê ma xira kerdî. Dima ra ma vejîyayî û ma ameyî Şirnex. Wexto ke ma ameyî Şirnex cayê ke ma tede bimanê çinbi. Eynî wextî de çîyêke ma borê zî çinbi. Ma tewr peyîn çadirêke akerd û ez û domanê xo uca de mendî."  

 

'Keyeyê mi hîrê rey ame rijnayîş la ez ageyraya cayê xo' 

 

Ayşeye prosesê koçberîyê xo wina qalî kerde: "Ma keyeyê xo awan kerd û ma sîstemê xo awan kerd. Şewêke reyna ma dewe ra vetî û ma demêke reyna çadire de mendî. Dima ra mi û domananê xo ma pîya bi destê xo keyeyêke awan kerd. Peyîn de dewlete reyna va şima eşkenê ageyrê dewa xo. Ma pêwa heywananê xo reyna ageyrayî dewe. Ma keyeyê xo yê dewe reyna viraşt. Ma reyna sîstemê xo awan kerd. Tam ma va xelas bi reyna dewe. Ma reyna hacet û heywananê xo dewe de verdayî û ma reyna ameyî tîya."

 

'Ma tîya ra nêşinê'

 

Serra 2015an de wextê qedexeyê tebervejîyayîşê kuçeyanê Şirnexî de keyeyê Ayşeye reyna ame rijnayîş. La Ayşe koçber nêbî û vana: "Çi beno wa bibo ez fek Şirnex ra vera nêdana û nêşina cayêke zî."

 

Ayşeye va: "Dewlete nêwazena ke Kurdî tîya biciwîyê. Nêwazena ke nameyê şarê Kurdî tîya bêro eşnawitiş. Neyarî vera şarê Kurdî kena. Kurdî ça bibê vana ez uca xira bikerî. La se beno wa bibo ma tîya terk nêkenê. Eke vera nê rijnayîşî ma xo ver dayo ma do heta peyîn xo ver bidê."