Zeynep Durgut

 

WAN - Kurdîstan de bi ameyîşê mewsîmê hamnanî de bêrîvanê Serhedî verê xo danê zozanan. Serhed de hemverê hemverê heme qedexeyan reyna cinî şinê zozanê tewr berz pes ditinê. 

 

Serhed de sera se şar zozanan bi weykerdişê pesî debara xo kenê. Dewa girêdayê qezaya Westanî dewa Darînîsî bêrîvanî şefeqê siba de wirzenê û verê xo danê zozanê tewr berz. Her çiqas zozanê tewr berz ameybî qedexekerdiş cinî reyna qedexeyan nas nêkenê û bi klamanê xo qedexeyan derbaz kenê.

 

Bi klaman xatirê xo rojî ra wazenê

 

Bêrîvanan ra Nezahat Kaplane ard ziwan ke ê bi serran o bêrîvanî kena û va ê bi îmkanê tewr kêm xo resnenê zozanê tewr berz û wina va: "Ez demêke derg o bêrîvanî kena. Bêrîvanî kedêke tewr pîl wazena. Ma şefeqê serê siba de wirzenê û heta şan de binê tîjî de ma pes ditnenê. Mintiqa de her kes bi pes weykerdişî debara xo kena. Bi rastî merdim zaf rincan beno la reyna zî merdim bi vînayîşê zozanan zaf zêde kêfweş beno. Ma nê zozanan de pîl bîyê. Ma bi keda xo ameyê na sewîye. Ma zehmetî nêancenê, la vera heme negatîfan pes weykerdiş kêfweşîyêke zaf cîya yo. Ma wazenê şêrê zozanê tewr weş. La seba qedexeyan ça bibo ma pesê xo  uca de çernenê. Ma hem serê siba, hem zî dimayê nimeroc pesê xo ditnenê. Dimayê ditnayîşê pesî ma bi klamê ke vanê ageyrenê dewa xo."

 

'Ez bêrîvanî ra zaf hes kena'

 

Sabrîye Kaplane zî arde ziwan ke ê bi weykerdişê pesî debara xo kenê û va ke kêfê înan zaf bêrîvanî rê yeno û wina va: "Bêrîvanî aramîyêke cîya dana merdiman. Merdim her perçeyêke xoza ra feyde gêno. Gama ke ma cinî serê siba yenê, ma pîya klaman vanê. Klamî zî adetêke bêrîvanî yê. Ma heta şan de zaf rincan, la reyna zî bi bêrîvanî dir zaf kêfweş a.”

 

'Cinî pes ditnenê, camêrdî berxan qesnenê'

 

 Bêrîvanan ra Medîne Kaplane zî dîyar kerde ke înan bi ameyîşê mewsîmê hamnanî dir verê xo dayê zozanan û wina dewam kerde: "Kurdîstan de her ameyîşê mewsîmê hamnanî ma zozanan de bêrîvanî kenê heta mewsîmê hamnanî. Mewsîmî vuryenê la xebata ma nêvuryena. Sey murayan ma şew û roj xebityenê. Xebate ra merdim kêfweş beno. Eke merdim bixebityo merdim xo baş hîs keno. Xêrê bêrîvanî ma her kerrayêke, awêke û zozanêke Kurdîstanî ra feyde gênê. Nika seba ke wextê berxbirnayîşî ameyo, camêrdî karê qesnayîşê berxan kenê, ma zî pes ditnenê. Dimayê ditnayîşî zî ma şan de bi klaman ageyrenê keye.