Berçem Cûdî/Ilham Eloso

 

KOBANE - Verfeka Hereketê Azadîya Cinîyanê Êzidîyan (TAJÊ) Ferîde Şingale derheqê hêrişanê dewleta tirkî yê Başûrê Kurdistanî ser qisey kerde û wina va: “Ganî ma destûr nêdî ke herra ma bêra dagirkerdiş. Kesê ke birayê xo roşenî do sey lekeyêk sîyaye ripelê tarîxî de bêrî nuştiş”

 

Her ke şono vera hêriş û dagîrkerîya artêşa tirkî ya vera Başûrê Kurdistanî de reaksîyonî zêde benî. Heta nika vera dagîrkerîye de xeylê çalakîye û protestoyî ameyî kerdene û nê çalakîyî her ke şono vila benî. Dewleta tirkî hewl dana herêmanê Başûrê Kurdistanî bêmerdim bikera û qezencanê kurdan hedef gêna. Gerîlayê Kurdistanî heta nika derbê girdî artêşa tirkî ro. Artêşa tirkî girê sînorî ser o hetê teknîk û leşkerî de estena xo zêdenaya.

 

Babete ser o Verfeka Hereketê Azadîya Cinîyanê Êzidîyan (TAJÊ) Ferîde Şingale qisey kerde û dîyar kerde ke kesê ke bîyî sebebê qetlîamê Şengalî ganî ewro destûr nêdî ke leşkerê tirkî derbazê herra Başûrê Kurdistanî bibî.

 

'Ganî bêvengîya xo xira bikerî'

 

Ferîde Şingale destpêkê qiseykerdişê xo de va ‘Ganî PDK destûr nêdo ke leşkerê tirkî şêrî herra Başûrê Kurdistanî. Ma hema Kerkuk û Şengalî xo vîra nêkerdo’ û wina dewam kerde: “Ganî hukmatê  Iraq û PDKyî bêvegîya xo xira bikerî û vera dewleta tirkî yê herra Başûrê Kurdistanî de vindetişê xo dîyar bikerî. Ganî vera hêrişan de reaksîyonî bêrî nawitiş.”

 

'PDK hêrişan tesdîq keno'

 

Ferîde Şingale qiseykerdişê xo yê verênan de bale ante astengkerdişê hêrişan ser û wina va: “Ganî hêrişê dewleta tirkî yê vera Başûrê Kurdistanî bêrî vindetiş. Bêvengîya PDKyî yena mehneya tesdîqkerdişê hêrişan. Ganî destûr nêro dayîş ke operasyonê Qendîlî destpê bikero û heme şarê Başûrî vera dagirkerîye de vengê xo berz bikerî.”

 

'Dişmenê pîyan nêbenê dostê lajan'

 

Ferîde Şingale dewamê qiseykerdişê xo de va: “Hêrişê Erdoganî yê vera Qendîlî do tesîrê xo bidî çar parçeyê Kurdistanî. Ganî ma no vatişê peyênan xo vîra nêkerî. Dişmenê pîyan nêbenê dostê lajan. Ganî ma goreyê na çekuye hereket bikerî û tena menfîetê xo yê şexsî nêfikirî.”

 

Ferîde Şingale qiseykerdişê xo yê peyênan de zî wina va: “Ganî ma bi çimê erjane nêewnî tarîxê xo û xoverdayîşan temaşe nêkerî. Ma wayîrê hîkaye û kulturê giran û muhîman î. Cok ra ganî merdim pawitişê herra xo û welatê xo de menfîetê xo yê şexsî nêfikiro. Her çar parçeyê Kurdistanî tena mal û milkê serekê partîyan nîyî. Kurdistan keyeyê heme kurdan o. Cok ra qerarê ke yenê dayîş tesîrê xo danî pêroyê herra Kurdistanî. Qendîl wayîrê tarîxê xoverdayîşan o. Ganî ma seba menfîetê xo no xoverdayîşî nêroşî û ma wayîrê xoverdayîşî bivejîyî. Ganî destûr nêdî dagirkeran. Çimkî dişmenê pîyan nêbenê dostê lajan."