STENBOL - Sereka Pêroyî ya Ka.Derî Nuray Karaoglu temsîlîyetê cinîyan ê wextê newe yê meclîsî de şîrove kerde û va înan babeta ke meclîs do reyna bibo camêrd hişyar kerdê û va înan vato ke ganî vera serdestîyê camêrdan cinî vajê ‘nê’ û va ê sey cinî partîyan ra îzahatêke pawenê.

 

Weçînayîşê 24ê Hezîrane de HDPî de 25 parlamenterê cinî, CHPî de 18, MHPî de 5, AKPî de 52 û Îyî Partî de zî 3 cinî kewtî meclîs. Sereka Pêroyî ya Komeleya Piştdayîşê Namzedê Cinî (Ka-der) Nuray Karaoglu dîyar kerde ke tabloyo peyîn de temsilîyê cinîyan qet baş nîyo û va ganî partîyê sîyasî na babete de îzahat bidê.

 

‘Hetê HDPyî de zî dayeyêke kêm o'

 

Nuraye yew bi yew îstatistîkê derheqê partîyê sîyasî yê amade kerdê de pare kerde û va HDP de 1.600 vernamzed estbîyê û înan ra 600 cinî bîyê û no zî tekabulê sera 47 keno û va: "27 parlamenterê HDPî ra 25 cinî yê. Na zî yena manaya sera 38. No daye goreyê HDPî kêm o. HDPî de sîstemê hemserekî esto. Belê goreyê partîyê bînan berz o la goreyê vatişê HDPî kêmî yo.”

 

Nuraye Îyî Partî zî şîrove kerde û va hûmara vernamzedê ci 2 hezar û 517 bîyê û înan ra tena 682 cinî bîyê û va tena 43 kesê kewtê meclîs û înan ra zî 3 heb cinî bîyê.

 

Nuraye bale ante ser dayeyê CHPî zî û da zanayîş ke 143 parlementerê ci tena 18 heb kewtê meclîs û va ê nê qebûl nêkenê.

 

Dayeyê parlamenterê cinî 17.1 o

 

MHP ra zî 49 parlamenter kewtê meclîs tena 5 hebî cinî bîyê û pêroyî de 103 parlamenterê cinî kewtê meclîs û da zanayîş ke no zî tekabulê 17.1 o. 

 

Nuraye tewr peyîn da zanayîş ke înan hişyar kerdo ke do meclîs tewr zêde bibo camêrd û wina zî bîyo û va ê heme partîyan derheqê nê de îzahatêke pawenê.