RIHA - Emîne Şenyaşara ke mêrde û di lajê aye hêrişê merdimê parlamenterê AKPî de Pirsûs de ameyî qetilkerdiş û lajêke aye zî birîndarî ame tewqîfkerdiş, dîyar kerde ke ganî hem qeydê kamerayê kargerî û nêweşxane vejîyê meydan û wina va: "Şima çira nimnenê? Madem şima heqdar ê şima çira şinê nîmeyê şewe de dêsê nêweşxane boyax kenê? Nêweşxaneyêke senîn o?" Emîne vengdayîşê hîsgêrî heme kesî rê kerde.

 

Pirsûs de 14ê Hezîrane de parlamenterê AKPyî û namzedê AKPî Îbrahîm Halîl Yildiz û merdimê ey hêriş kerdî û dimayê hêrişî birayê esnaf Adîl û Celal Şenyaşar ke wedarnayî Nêweşxaneyê Dewlete yê Pirsûsî uca de ameyî înfazkerdiş. Birîndar Mehmet Şah Yildiz zî nêweşxane de cuya xo vinî kerd. 

 

Pîyê domanê birîndaran Haci Esvet Şenyaşaro ke waşt şêro nêweşxane verê domananê xo de hetê merdimê parlamenterê AKPî ra ame qetilkerdiş. Kamerayê nêweşxane ameyî texrîbkerdiş û dêsê ke gonî gina bî piro zî boyax kerdî. Dimayê hedîse Fadil Şenyaşaro ke birîndar bi zî nêweşxane de ame tepiştiş û tewqîfkerdiş. Mehmet û  Ferît Şenyaşar zî dimayê îfade ameyî veradayîş.

 

‘Şima çira dîmenê kamera nimnenê’

 

Maya Emîne Şenyaşare zî va ke ganî qeydê kamera vejîyê meydan û wina va: "Lajê mi Fadil bi birîndarî berdî hepisxane. Çira kes înan ra nêame tepiştiş û tewqîfkerdiş. Ameyî zereyê dikanî de hêriş kerdî. Nêweşxane de hêriş kerdî. Çira ê nînê tepiştiş û tewqîfkerdiş. Polîsî heme çî zanê. Şima çira kamera nimnenê. Derûdorê dikanê ma de kamera estê. Ê dîmenan vejê. Şima çira nimenê?"

 

‘Şima dêsê nêweşxane çira şande boyax kerd?’

 

Emîne da zanayîş ke mêrdeyê aye bi lînçkerdiş ameyo qetilkerdiş û dêsê nêweşxane nimeyê şewe boyax kerdê û wina va: "Şima çira boyax kenê? Madem şima heqdar ê şima çira wina kenê? Çira îfadeyê înan nînê girewtiş. No hukmatêke senîn o? Ê DAIŞî ra xirabîr ê. Yê mîyanê Kurdan de DAIŞ ê. Verê çimanê ma de mêrdeyê mi qetilkerdî. Ma pîya şî nêweşxane. No nêweşxaneyêke senîn o."

 

Emîne tewr peyîn qiseykerdişê xo de veng da heme sazgehê komelê sîvîl û seba ke edalet virazyo gerek hetkarî bidê û bi israr waşte ke dîmenê kamera vejîyê meydan.