STENBOL - Parlamentera HDPyî Huda Kaya netîceyê weçînayîşî şîrove kerde û va tu çîyêke nêqedîya û wina va: "Têkoşîn newe dest pêkerd. Hişmendîyê kolektîf vejyayî meydan. Ma tewr zêde rêxistin bî û ma bi hêvî yê.”

 

Goreyê dayeyê resmî yê weçînayîşê 24ê Hezîrane hîrên partîya tewr pîl yê Tirkîya HDP ya. HDP bi namzedê xo yê Tirk, Kurd, Ermenî, Êzidî, Elewî, Ereb, Musluman, sosyalîst û cinî, tabloyê zafnasnamebîyayîşî yê Tirkîya awan kerd. Huda Kaya ke bi nasnameyê xo yê îslamî yena zanayîş û 27in wextê Parlamentoyî de ca girewte netîceyê weçînayîşî şîrove kerde. Hudaye da zanayîş ke têkoşîn newe ra dest pêkerd û ganî muxalefet pîya têkoşîn bikero.

 

'Netîce se beno wa bibo hema hêvî zaf hêzin a'

 

Hudaye dewam de arde ziwan ke hema derheqê weçînayîş de nêzelalbîyayîş esto û wina va: "Endîşeyêke û komelî de şiknayîşêke virazya. Çi yeno ciwîyayîş wa bêro ciwîyayîş, netîce se beno wa bibo hêvî hema esta û hêvîya mi hema hêzin a. Referandumê 16ê Nîsane de cepheyêke ‘nê’ ê xurt virazya û prosesê 24ê Hezîrane de hişmendîyêke kolektîf virazya û muxalefet pîya têgeyra."

 

Hudaye tewr peyîn qiseykerdişê xo de da zanayîş ke ganî hişmendî û tecrubeyê wextê peyîn de vejyayo meydan nêro çinkerdiş û ganî muxalefet nê bizano û wextê ameyox de nê hişmendîyê xo tewr xurt bikero.