MÊRDÎN - Weçînayîşê 24ê Hezîrane rê wextêke kilm mend û Mêrdîn de xebatî bêmabên dewam kenê. Hemsereka DBPyî Mêrdînî Leyla Bozkurte derheqê xebatan de qisey kerde û va: "Dewan û qezayan de ma eleqeyêke pîl vînenê. Hêrsê şarî zerrîya înan de bi hawayêke baş mojneno ra."

 

Xebatê weçînayîşê Mêrdînî bêmabên dewam kenê û HDP her ca de xebatan meşneno. Hemsereka DBPî ya Mêrdînî Leyla Bozkurte derheqê babete de qisey kerde û veng da ke ganî şar wayîrê îradeyê xo vejyo û şêrê serê sindoqan."

 

'Ma dew bi dewe, qeza bi qeza xebatan meşnenê'

 

Leyla arde ziwan ke ê prosesê weçînayîşî ra rew derbaz benê û wina va: "Ma xebatanê xo bi namzedê serekomarîyê Selahattîn Demîrtaşî dir kenê. Mêrdîn de xebatê girîng yenê meşnayîş. Ma qeza û dewanê xo de xebatê pîl meşnenê. 6 namzedê ma estê. Ganî ma heme namzedanê xo bieşrawê meclîs. Ma dew û qezayan de rastê eleqeyêke pîl yenê. Hêrsê şarî xo baş dano teber. Şar do cewabêke baş bido îqtîdar."

 

'Mesajê şarî zelal o'

 

Leyla da zanayîş ke qerarbîyayîşê şarî bandurêke pîl serê înan de keno û bi hêvîyê ke do 6 namzedê xo bieşrawê meclîs û wina dîyar kerde: "Prosesê peyîn de bi OHALî şar kewt binê tedayê pîl. Bi di serrî yo ma OHAL ciwîyenê. Hetê muxalîf binê OHALî de hedef ameyî girewtiş. Ganî ciwan û cinîyê ma wayîrê sindoqan vejyê. Ma veng danê heme kesan ke wayîr îradeyê xo vejyê û şêrê serê sindoqan."