MÊRDÎN - 33 ciwanê ke Pirsûs de ameyî qetilkerdiş, yew ci ra Murat Yurtgul bi. Maya Muratî Şemsa Yurtgule dîyar kerde ke Haci Esvet Şenyaşar û lacê aye hetê merdimê parlamenterê AKPî ra ameyê qetilkerdiş û veng da Kurdê ke rayan danê AKPyî û wina va: "Her weçînayîşî de seba rayan domananê ma qetil kenê. Destê xo bidê serê wijdanê xo."

 

Pirsûsê Rihayî de Haci Esvet Şenyaşar û lajê ey Adîl û Celal netîceyê hêrişê çekdarî yê merdimê parlamenterê AKPyî û pawitoxê înan ver cuya xo vinî kerdî û no ser şarî serê medyaya komelî de reaksîyonê xo mojnayî ra. Maya Murat Yurtgulo ke yew 33 ciwanê ke 20ê Temmuza 2015an de Pirsûs de hêrişê bombaya ganî de cuya xo vinî kerd, Şemsa Yurtgule veng da kesê ke rayanê xo danê AKPî û wina va: "Êdî destê xo bidê serê wijdanê xo. Êdî bes o."

 

Şemsaye dîyar kerde ke pî û lajê ke Pirsûs de cuya xo vinî kerdê, sey ciwanê ke 3 serre verê ameyê qetilkerdiş bê gunayê û wina va: "Murat û 32 embazê xo Pirsûs de şehîd kewtî. Bê suc, bê guna ameyî qetilkerdiş. Ewro reyna uca de qirkerdiş kerdî. Êdî bes o, wa destê xo bidê serê wijdanê xo. Ma gonîya ciwanan ra mird nêbenê. Domanê ma wendekar bî. Seba şarê ke binê zulmî de yê şî uca. Serê pişta înan de ne sîleh û ne zî bomba bî."

 

'Wa Kurdî êdî reyan nêdê AKPyî'

 

Şemsaye tewr peyîn wina va: "Sûcê înan çibi? Kurdan ra çi wazenê? Êdî bes o, ganî şar şaşî ra ageyro. Ma Kurd ê, ma xo nas kenê. Ma pey kesî de nêşinê. Domanê ma, ciwanê ma yenê kiştiş. Ma domananê xo bi zehmetîyêke pîl danê wendiş, pîl kenê. Wa her kes xo bikero vara no keyeyî, o keyeyî ra hîrê rayî kêm bî. Bi gonîya merdiman gole viraştî. Wa êdî hişê Kurdan bêro sereyê înan. Her weçînayîş de seba rayan domananê ma qetil kenê."