AMED - Namzeda Partîya Demokratîke ya Şaran (HDP) ya Amedî Ferda Fahrîoglu Akine arde ziwan ke Kurdî  bingeyê awankerdoxê Tirkîya yê û tarîxê Komare ra heta nika hewl ameyo dayîş ke Kurdî bêrê çinkerdiş û wina va: "Eke dewletêke vera şarê xo polîtîkayê şer û qirkerdişî bimeşna, ciwanan bodrum de bêveşna, o wext problemê Kurdan nê, problemê Tirkîya estê."

 

Namzeda HDPî ya Amedî ke rêza 12ine de Ferda Fahrîoglu Akine akademîsyenêke ya, babeta ‘problemê Kurdan de’ îmza eşta binê xeylê xebatan û seba ke îmza eşta ‘vilawike aştîye' ameya îxrackerdiş. Ferdaye dîyar kerde ke problemê Kurdan nê, problemê Tirkîya estê û wina va: "Eke dewletêke vera şarê xo  polîtîkayê şer û qirkerdişê bimeşna, ciwanan bodrum de bêveşna, o wext problemê Kurdan nê, problemê Tirkîya estê.

 

La no problemê mezgê dewlete yo. Ma prosesê îqtîdarê AKP, MHP û CHPyî dî. Yewin çîya ke nêvuryena, mezgê dewlete bî."

 

'Ma cuya ke têduşt bîyarê meydan'

 

Ferdaye da zanayîş ke vatişê ‘HDP partîya cinîyan o' vatişêke veng nîyo û wina dewam kerde: "Ma sey HDPyijî ma do no vatişî zereyê ci pirr bikerê û pêşkêşê şarê Tirkîya bikerê. Sîstemê hemserekî bi hawayêke têduştî her ware de kewt ciwîyayîş. Netîceyê têkoşînê 40 serreyî de destkewtişî pîl kewtî dest. Ma do nê hemserekkomarî de zî bi ca bîyarê. Ma do sozê sey 'wezaretê cinîyan, dîwanê edaletî, meclîsê cinîyan, wezaretê domanan' bi ca bîyarê."

 

'Wa cinî hêzê xo rê bawer bê'

 

Ferdaye tewr peyînîya qiseykerdişê xo de da zanayîş ke do meclîs de biba vengê cinîyan û wina va: "Dewlete û camêrdî bi hewayêke cidî cinî,yan ra tersenê. Wa cinî bi hêzê zerrîya ma bawer bikerê. Eke ma xo ra bawer bikerê, kes nêeşkenê bi ma bido vindîkerdiş."