COLEMÊRG - Berîvanê Colemêrgî derheqê weçînayîşî û qedexeyê mintiqa de qisey kerdî û vatî ke êdî ganî 16 serrî ra serrîyêk zî zêde nêbo.

 

Wextê ke AKP îktîdar o û heta nika mintiqaya Colemêrgî de her roje zozanî yenê qedexekerdiş. Cinîyê ke dewa Minyanîşî bi weykerdişê pes debara xo kenê, reaksîyon mojnayî hukmatî û vatî ke ganî cinî 24ê hezîrane de serê sindoqan de îradeyê bimojnê temamê dinya.

 

'Ma do 24ê hezîrane de peynîya qedexeyan bîyarê'

 

Cinîyê bêrîvanijî Makbule Olmeze arde ziwan ke seba qedexeyan pesê înan zirar dîyo û va ke ganî 24ê hezîrane de peynîya qedexeyan bîyarê û wina va: "No weçînayîş seba şarê kurdî bi mana û girîng o. Ma bi hêvî û bawerîye yê ke emsar do bibo roşanê mazluman. Ez bi serran o dewe bi dewe bi weykerdişê pes û bêrîvanî debara xo kena. Labelê ma emsar seba qedexeyan ma nêeşkenê pesê xo vejê koyan. Ganî êdî peynîya qedexeyan bîyarê. Her wext cuya ma de sînor û qedexeyê dewlete estê. Nê qedexeyî ma heme çî ra dûr fînenê. Ma tersenê zozanan de pesê xo biçernê, seba ke ma zanê eke ma şêrê do hewa ra bombeyan bierzê û dima ra zî vajê 'Welle nê terorîst bî'. No semed ra ma nêeşkenê pesê xo biçernê. Ganî taybetî cinîyê Colemêrgî 24ê hezîrane de şêrê serê sindoqan û bi no hewa peynîya qedexeyan bîyarê."

 

'Ganî 16 serrî ra serrîyêk zî zêde nêbo'

 

Cinîya bi nameyê Seyhan Olmeze zî dîyar kerde ke êdî wextê îktîdaro ke esto pirr bîyo û va ê wazenê dewê înan, zozanê înan êdî azad bibê û wina va: "Serrê verî rewşa ma hîna baş bî. Qet nêbo hende qedexeyî nêameyne îlankerdiş. Ma emsar bi nê qedexeyan mexdûr kerdî. Ganî 16 serrî ra serrîyêk zî zêde nêbo. Destê ma û lingê ma ameyê girêdayîş. Ma nêeşkenê şêrê koyanê xê pesê xo biçernê. Ma hêvî kenê ke 24ê hezîrane ma rê bibo wesîleyê mijdîyanê azadîya şaran."

 

'Lazimîya ma bi îqtîdarê ke bi qedexeyan îdare keno nîyo'

 

Heto bîn ra Nacîye Demîre zî va ê aşitî wazenê û wina va: "Ganî ma tifaqê xo awan bikerê û pîya aştî bîyarê welat. Gama ke cinî şinê serê sindoqan, ganî zulm û teda bîyarê verê çimanê xo û wina raya xo bixebitnê. Lazimîya ma bi îqtîdarê ke bi qedexeyan îdare keno nîyo. Bi qedexeyan cuyayîş bikerê hepisxane. Seba ma qedexeyî lazim nîyê. Ez veng dana heme cinîyan ke 24ê hezîrane de şêrê serê sindoqan." 

 

'Do 24ê hezîrane de hesab bidê şarî'

 

Asmîn Olmeza ke tewr peyîn da zanayîş ke şarê kurdî wayîrê îradeyê xo vejîyê û va ke 24ê hezîrane de cewabêke înan esto û wina va: "Ma êdî nê hişmendî qebûl nêkenê. Nê çîyê ke serrê 90an de nêameyêkerdiş wazenê bi qedexeyan bi ca bîyarê. Bi qedexeyê serê zozan û newalanê ma de wazenê ke ma dewanê xo veng bikerê. Do 24ê hezîrane hesab bidê şarî."