ÊLIH - Cinîyê TJAyî dîyar kerdî ke Êlih de 250 cinî serê sindoqan de ameyê wezîgekerdiş û sera 75ê xebatê weçînayîşî yê bajarî meşnenê. Cinî dîyar kenê ke ê kuçe de yê, sîyaset de yê û qetî xo nêdanê pey dêsan.

 

Aktîvîstê TJAyî seba HDPî xebatê weçînayîşî bêmabên meşnenê. Êlih de 250 cinî serê sindoqan de ameyî wezîfedarkerdiş û cinîyan dîyar kerdî ke pêwa heme tedayan xebatanê xo dewam kenê. Cinîyan ard ziwan ke xebatê ke meşnenê hetê çapemenî ra nînê vînayîş û ardî ziwan ke sera 75 xebatê weçînayîşî hetê cinîyan ra yenê meşnayîş. Cinîyan seba weçînayîşêke bi asayîş veng dayî ke bibê zerrîwaşteyê sindoqan.

 

Aktîvîsta TJAyî Sedef Ozdemîre da zanayîş ke startê weçînayîşî bi şîarê 'cinîya azad, komelo azad' Heskîf dayê û vatî merkez û dewê Êlihî bi pêroyî de 250 cinî  xebatê weçînayîşî meşnenê. Sedefe wina va: "Ez seba weçînayîşan veng dana cinîyan. Amancê AKPyî o yo ke cinîyan hepsê mîyanê çar dêsan bikerê. Ma do nê zîhnîyetê meydan ra wedarnê. Ma waran de yê, qetî ma xo nêdanê pey dêsan. Heta 24ê Hezîrane ma do bêmabên bixebitîyê. Clarayan ra heta Rosayan,  Sakîneyan ra heta Leylayan û Fîdanan ma her ca de yê. Ma kuçeyan de sîyaset de yê, pêwa heme şîdetî ma waran de yê."

 

'Sera 75 cinî xebatan meşnenê'

 

Aktîvîsta TJAyî Derya Aslane arde ziwan ke weçînayîş zaf girîng o û va do cewabê bombavarankerdişê bajaran, pelçiqnayîşê cenazeyan, tayînkerdişê qayûman, tepiştişê sîyasetmedaran do 24ê Hezîrane debidê û va Êlihî sey cinîyê TJAyî her ca de xebate meşnenê. Derya wina va: "Êlih de sera 75ê xebatan cinî meşnenê. Heme komîsyonan de cinî estê. Na babete de karê serkewte kenê. Ma cinîyê TJAyî binê tecrîdî de yê. Nameyê TJA zêde nêbeno rojeve. TJA sey Meclîsê Cinîyan ê HDPî kono rojeve.

 

Songul Korkmaza TJAyije da zanayîş ke ê derheqê asayîşê sindoqan de xebatan meşnenê û va ê rejîmê yew mêrdekî de têkoşîn de yê.