MERKEZÊ XEBERAN - Merdimê Vînîbîyayan û ÎHD’yê Amedî hewteyê 842. de aqûbetê vînîbîya Atîlla Osmanoglu persayî.

 

Merdimê Vînîbîyayeyan û Komeleya Heqê Merdiman (ÎHD) çalakîya xo ya nê hewteyî organîze kerdî û aqubetê merdimanê xo yê destbendkerdiş de ameyê vînîkerdiş persayî û venga caardişê edaletê muhakemeyî kerdî. 

 

Amed

 

Merdimê Vînîbîyayan û Komeleya Heqê Merdiman (ÎHD) a Şaxê Amedî hewteyê 842. de çalakîya “Wa vînîbîya bêrê dîyayîş û kerdoxî bêrê muhakemekerdiş” viraşt. Çalakî ra Rayberê ÎHD’yî, Hemsereka DBP’yî ya Amedî Sultan Yaray, Merdimê Vînîbîyayan û temsîlkarê rêxistinê sivîl û zaf hûmarî de kesî beşdar bîyî. No hewte aqûbetê Atîlla Osmanoglu ame persayîş.

 

Metno ke behsa Atîlla Osmanoglu keno hetê endamê Komîsyonê Vînîbîyayan ê ÎHD’î Firat Akdenîz ra ame wendiş.

 

Aqûbetê vînîbîyayîşê Atîlla Osmanoglu wina yo:

 

“Atîlla Osmanoglu bi keyeyê xo Hezroyê Amedî de cuyayîne. Rîyê gefê leşkeran koçê merkezê Amedî keno. 25ê Adara 1996î de Atîlla Osmanogluyî di polîsî esparê ‘toroso sipî’ kenê. Pîyê Muhyettîn Osmanoglu şino dadgehe û vano; lajê mi polîsan girewtê û berdê. Polîsan eşkera kenê ke Atîlla nêameyo destbendkerdene û peynî zî qet agahî Atîlla Osmanogluyî ra nîna girewtiş.

 

Peynî de endamê JÎTEM’î Abdulkadîr Aygan vano ke Atîlla Osmanoglu hetê JÎTEM’î ra ameyo remnayîş û ameyo kiştiş. Keyeyê Atîlla Osmanoglu muracatê Dadgeha Heqê Merdiman a Ewropa keno û Tirkîya mehkûmê tazmînatî beno.”

 

Peynîya beyanatî seba vîrardişê Atîlla Osmanoglu û heme vînîbîyayan çalakîya roniştişî ame kerdene û çalakîya nê hewteyî peynî bî.

 

Colemêrg

 

Şaxa ÎHD’yî ya Colemêrgî û merdimê vînîbîyayeyan hewteyê 168ine ê çalakîya xo de, Kuçeyê Hunerî yê qezaya Geverî ameyî têhet. Îdarekarê DEM Partîye zî tewrê çalakî bîyî. Çalakî de pankartê “Wa vînîbîyayeyî bêrê vînayîş” û fotografê vînîbîyayeyan ame wedaritiş. Ame waştiş ke kiştoxê Bîşeng Anike bêrê muhakemekerdiş ke serra 1992ine de Şirnex de badê destbendkerdişî, ameye qetilkerdiş.

 

Êlih 

 

Endamê ÎHD’yî û merdimê vînîbîyayeyan hewteyê 678ine ê çalakîya xo de verê Anitê Heqê Merdiman ê Cadeyê Gulistane de kom bîyî. Çalakî de pankartê “Wa vînîbîyayeyî bêrê vînayîş, faîlî bêrê muhakemekerdiş” ame akerdiş û xêrcê avûkatanê heqê merdiman, temsîlkarê rêxistina komelê sivîlî zî beşdarê çalakî bîyî. No hewte aqûbetê Zeynel Kursep ame persê ke badê 24ê adara 1994ine Êlih de ame remnayîş, êdî agahî ci ra nêamî girewtiş.”