WAN- Ame îdiakerdiş ke qeyûmî Şaredarşya Bajarê Pîlî ya Wanîxebatkaranê cinîyan semedê pakkerdişê daşiran wezîfedar kerdo. Hemşaredare Neslîhan Şedal û Abdullah Zeydan veng dayî ke zextê xebatkaran ser o peynî bîyarê. 

 

15ê sibate de Şaredarîya Bajarê Pîlî ya Wanî rê qeyûm ame tayînkerdiş û a roje ra nata zextê xebatkaranê şaredarîye ser o dewam keno. Hemşaredare Neslîhan Şedale û Abdullah Zeydanî reaksîyon mojna. Hemşaredaran, dîyar kerdî ke îdareyê qeyûmî dir tayînê bêlîyeqat yenê kerdiş, bi hawayêko keyfî cayê xebatkaran yeno vurnayîş û bi taybetî zî xebatkarê cinî semedê karê xiraban yenê şirawitiş. Ame îdiakerdiş ke xebatkarê cinî yê Şaredarîya Bajarê Pîlî ya Wanî bêwaştişê înan semedê pakitî, sazgehê cîyayeyan rê yenê şirawitiş. Ame îdiakerdiş ke xebatkarê cinî semedê pakkerdişê daşirê sazgehê girêdayeyê walîtî ameyê wezîfedarkerdiş û badê nê cinîyan nê çî red kerdo û derheqê înan de zabitname ameyo amadekerdiş. 

 

 Hemşaredaran ra reaksîyon

 

Hemşaredare Neslîhan Şedal û Abdullah Zeydan derheqê îdia de hesabê xo yê X’î ra mesaj pare kerdî û dîyar kerdî ke tayînkerdişê qeyûman tena mudaxileyêk sîyasî nîyo la eynî wextî de yewser hedefgirewtişê heqê xebatkaran o û reaksîyonê şîdetinî mojnayî.