Pelşîn Çetînkaya

 

AMED - Şaredarîyêka ke modelê cinî ke zîhnîyetê serdest awan kerdo red kena û Merkezê Cuye yê Cinî akerd û têkoşînê nê dana şaredarîya Peyasî ya.  Şaredarîya Peyasî bi nê merkezê ke akerda, seba cinîyan îmkanê aktîvîteyê sporî yê rehet û biasayîş pêşkêş kena.

 

Zextê cinîyan ser o dewam kenê û her wareyê komelî de wareyê seba cinîyan yenê çinkerdiş. Cinî xeylêk heqan ra bêpar yenê verdayîş. Bêşik têkoşînê cinîyan ê hemverê nê de dewam keno. Yew wareyê ke seba cinîyan têkoşîn kenê, şaredarî yê. Şaredarî bi merkezê cuye yê cinîyan hewl danê cinîyan zêdeyêr vejê vernî û îmkanê ke modelê zîhnîyetê serdestî yê camêrdan xilas bibê awan kenê. Nê şaredarîyan ra yewe zî Peyasê Amedî ya. 

 

Berpirsîyara Merkezê Cuye yê Cinîyan ê Peyasî Berîvan Suleymanoglu Yaşa derheqê xebatê merkezî de qisey kerd.

 

Cinî hem hetê fîzîkî de hem hetê psîkolojîkî de rehet benê

 

Berîvane wina vat: “Ma wareyê sporî de xizmet danê cinîyan. Bi armancê hetê fîzîkî de ma paştdayîş bidê weşîya înan, xebatan kenê. Eynî wextî de hetê psîkolojîkî de zî xo rehet hîs kenê. Ganî nê merkezê wina her cayê Peyasî de bêrê akerdiş. Waştiş xeylêk zêde yo. Beno ke no ca qîm nêkero. Lazimî pêro cinîyan seba çîyêk winasî est a. Pêwa nê no paştdayîş dano têduştîya cinsê komelî zî. Cinî benê wayîrê hişmendî.”

 

‘Pêro cinî eşkenê bibê endam’

 

Berîvane dewam de wina vat: “18 serrî ra dima cinî eşkenê muracat bikerê. Ma tîya bi 6 seansan aver şinê. No ca serê sibayî saete 08.00ine de abeno û şan de heta mabêne 20.30-21.00’ê dewam keno. Ma bi hawayêk di koman xebatê xo kenê. Her roje akerdo. Roja yewşeme roja telefî ya. Roja yewşeme tenê ma saete 10.00ine de akenê û 18.00ine de gênê. Cardîo, fîtnes, plates yenê dayîş. Di embazê ma yê dîyetîsyenî est ê. Cinî wexto ke yenê tîya keyfê înan yeno, moralê înan baş beno. Bi paştdayîşê mamosteyan yenê xo ser. Muzîkê ke yeno pirodayîş, bi ziwanê dayîke yo. Nê semedî ra keyfweş benê. Projeyê bêrê de do dersê cîya zî ca bigîrê.”